ވިޔަފާރި ބަނދަރު ތިލަފުއްޓަށް ބަދަލުކުރުމަކީ މުހާރަށް އެންމެ މުހިންމު މަޝްރޫއުކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ދިދާޅުވެއްޖެއެވެ.
އެމަނިކުފާނު މިހެން ވިދާޅުވީ މާލޭ ވިޔަފާރި ބަނދަރުގެ އޮޕަރޭޝަން ތިލަފުއްޓަށް ބަދަލުކުރުމަށް ކުރަމުންގެންދާ މަސައްކަތް ބައްލަވާލެއްވުމަށް ތިލަފުއްޓަށް ކުރެއްވި ޒިޔާރަތުގައި މީޑިއާތަކަށް ދެއްވި އިންޓަވިއުގައެވެ.
ރައީސުލްޖުމްހޫރިއްޔާ ތިލަފުއްޓަށް ވަޑައިގެންނެވުމުން މަރުޙަބާ ދެންނެވީ މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ ސީއީއޯ ކެޕްޓަން ޙުސައިން ޝަފީގެވެ. ރައީސް ގެ ވާހަކަފުޅުގައި މި މަސައްކަތް ސަރުކާރުގެ ހުރިހާ ފަރާތްތަކާއި އަދި މިކަމުގައި އެހީތެރިކަންދޭ ބޭރުގެ ފަރާތްތަކާއެކުގައި ވަރަށް ކާމިޔާބުކަމާއެކު ކުރިއަށްދާކަމުގައި ވަނީ ވިދާޅުވެފައެވެ.
މި މަސައްކަތުގައި ރެޔާއި ދުވާލު ވަރަށް ބުރަކޮށް ހަރަކާތްތެރިވާ ކަމާބެހޭ ސަރުކާރުގެ މިނިސްޓްރީތަކާއި ކުންފުނިތަކުގެ ވެރިންނާއި މުވައްޒަފުން ކުރައްވަމުން ގެންދަވާ އަގުހުރި މަސައްކަތް ފާހަގަކުރައްވައި، އެ ފަރާތްތަކަށް އެމަނިކުފާޏު ވަނީ ޝުކުރު ދަންނަވާފައެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަކީ ސަރުކާރުން ހާއްސަ އިސްކަމެއް ދެއްވައިގެން ކުރައްވަމުން ގެންދަވާ މަސައްކަތެކެވެ. އެގޮތުން ޖާގަ ބޮޑު، ވަސީލަތް ފުރިހަމަ ޕޯޓެއްގެ ގޮތުގައި، އަންނަ އަހަރުގެ ނޮވެންބަރު މަހު މާލޭ ވިޔަފާރި ބަނދަރު ތިލަފުށީގައި އޮޕަރޭޝަނަށް ގެނެވޭނޭކަމުގެ ފުރިހަމަ ޔަގީންކަން ރައީސް ވަނީ ދެއްވާފައެވެ.
ތިލަފުއްޓަށް މާލޭ ވިޔަފާރި ބަނދަރު ބަދަލުކުރުމުގެ މަސައްކަތުގައި، އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައެވެ. ބިންގަނޑު އެއްވަރުކޮށް މަގުތައް ހެދުމުގެ މަސައްކަތްތައް ކުރިއަށްދާއިރު، އެތެރޭގެ ކީ-ވޯލްގެ ހިއްކި ސަރަހައްދު ބެކްފިލް ކުރުމުގެ ގާތްގަނޑަކަށް %40 މަސައްކަތް ވަނީ ނިމިފައެވެ. އަދި ކީ-ވޯލަށް ބޭނުންވާ ޕްރީކާސްޓް ކޮންކްރީޓް ބްލޮކްތައް ސައިޓުގައި އުފެއްދުމުގެ މަސައްކަތާއި، ބޭނުންވާ މެޝިނަރީއާއި ވަސީލަތްތައް ހޯދުމުގެ އިތުރުން ޓާމިނަލް ޢިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތް މިހާރު ދަނީ ކުރިއަށެވެ.
ތިލަފުށީގައި ގާއިމުކުރާ 60 ހެކްޓަރުގެ ޖާގައިގެ މި ބަނދަރު ހުޅުވޭއިރު އަހަރަކު 390،000 ޓީ.އީ.ޔޫ. ކެޕޭސިޓީގައި ކޮންޓެއިނަރު ގެންގުޅުމުގެ ޖާގަހެދޭނެއެވެ. އަދި މުޅި މަޝްރޫއު ނިމިގެންދާއިރު މި އަދަދު އަހަރަކު 1.8 މިލިއަން ޓީ.އީ.ޔޫ. އަށް ކޮންޓެއިނަރުގެ ކެޕޭސިޓީ އިތުރުކުރެވޭނެއެވެ. ބަނދަރު ހުޅުވާނީ ފުން މިނުގައި 14.6 މީޓަރު ހުންނަ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލަކާއެކުގައެވެ. މި ކީ-ވޯލް 1.4 ކިލޯމީޓަރަށް ދިގުކުރުމުގެ ޖާގައޮންނާނެއެވެ.
