ސައުދީ އަރަބިއްޔާއަކީ ރާއްޖޭއަށް މުހިއްމު ތަރައްގީގެ ބައިވެރިއެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ، ސައުދީގެ 96 ވަނަ ގައުމީ ދުވަހާ ގުޅިގެން ރަސްގެފާނަށާއި، ވަލީއަހުދު އަދި ބޮޑުވަޒީރަށް ވަކިވަކިން ފޮނުއްވި ސިޓީފުޅުތަކުގައެވެ.
ސައުދީ އަރަބިއްޔާގެ ގައުމީ ދުވަހުގެ މުނާސަބަތުގައި، ދެ ހަރަމްފުޅުގެ ޚާދިމް، ރަސްގެފާނު ސަލްމާން ބިން އަބްދުލްއަޒީޒް އާލް ސައުދަށާއި، ސައުދީ އަރަބިއްޔާގެ ވަލީއަހުދު އަދި ބޮޑުވަޒީރު، މުހައްމަދު ބިން ސަލްމާން ބިން އަބްދުލްއަޒީޒް އާލް ސައުދަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ ތަހުނިޔާ ފޮނުއްވާފައެވެ.
ރަސްގެފާނަށާއި، ވަލީއަހުދު އަދި ބޮޑުވަޒީރަށް ވަކިވަކިން ފޮނުއްވި ސިޓީފުޅުތަކުގައި، ރައީސުލްޖުމްހޫރިއްޔާ ވަނީ ސައުދީ އަރަބިއްޔާއަކީ ދިވެހިރާއްޖޭގެ ގާތް އަދި އިތުބާރުހުރި ބައިވެރިއެއްކަން ފާހަގަކުރައްވާފައެވެ. އިސްލާމީ އަގުތަކާއި އުންމަތުގެ އެއްބައިވަންތަކަމުގެ މައްޗަށް ބިނާވެފައިވާ ދެ ގައުމުގެ ޒަމާންވީ ގުޅުން، ގާތް ގުޅުމަކާއި އިހުތިރާމުގެ ތެރެއިން ދަނީ އިތުރަށް ބަދަހިވަމުންކަން އެމަނިކުފާނު ފާހަގަކުރެއްވިއެވެ.
މީގެއިތުރުން، ދެ ގައުމުގެ ދެމެދުގައި އޮތް އެކުވެރިކަމާއި އެއްބައިވަންތަކަމުގެ ގުޅުން ކުރިއަށް އޮތް އަހަރުތަކުގައި އިތުރަށް ހަރުދަނާވެ، އޭގެ ލާބަޔާއި މަންފާ ދެ ގައުމުގެ ރައްޔިތުންނަށް ލިބިގެންދާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
އަދި ދިވެހިރާއްޖޭގެ ތަރައްގީގެ މުހިންމު މަޝްރޫއުތަކަށް އިންވެސްޓްކުރުމާއެކު، ދެ ގައުމުގެ ދެމެދުގައި އޮތް އިގްތިސާދީ ގުޅުން އިތުރަށް ފުޅާކުރުމަށް އުންމީދުކުރައްވާ ކަމަށްވެސް އެމަނިކުފާނު ވިދާޅުވިއެވެ. ހަމައެހެންމެ، ދެ ގައުމުގެ ގުޅުން އިތުރަށް ބަދަހިކޮށް، ރައްޔިތުންނަށް ދާއިމީ ފައިދާ ލިބޭނެ އާ މަގުތަކެއް ފަހިވެގެންދިއުމަށް އެދިވަޑައިގަންނަވާ ކަމަށްވެސް ރައީސުލްޖުމްހޫރިއްޔާގެ ސިޓީފުޅުގައި ބަޔާންކުރައްވާފައިވެއެވެ.
ރައީސްގެ މެސެޖް ނިންމަވާލައްވަމުން، ރަސްގެފާނާއި ވަލީއަހުދަށް ފުރިހަމަ ސިއްހަތަކާއި ކާމިޔާބީއަށް އެދިވަޑައިގެންނެވިއެވެ.
