ބޭންކް އޮފް މޯލްޑިވްސްގައި ހުރި އާންމުންގެ ޑިޕޮސިޓް ފައިސާ ބޭނުންކޮށްގެން 50 މިލިއަން ޑޮލަރުގެ ޓީ-ބިލެއް އަނބުރާ ދައްކާފައިވާ ކަމަށް ބުނެ ދެކެވޭ ވާހަކަތައް މިނިސްޓްރީ އޮފް ފިނޭންސުން ދޮގުކޮށްފިއެވެ.
ފިނޭންސް މިނިސްޓްރީން ބުނި ގޮތުގައި، މި ފައިސާ އަނބުރާ ދައްކާފައިވަނީ ދުރާލާ އެކަމަށް ތައްޔާރުވެ، ސޮވްރިން ޑިވެލޮޕްމަންޓް ފަންޑަށް (އެސްޑީއެފް) ޖަމާކުރަމުންދިޔަ ފައިސާ ބޭނުންކޮށްގެންނެވެ.މި ސެޕްޓެމްބަރު މަހުގެ 17 ވަނަ ދުވަހު މުއްދަތު ހަމަވި މި 50 މިލިއަން ޑޮލަރުގެ ޓީ-ބިލް ކަނޑައެޅިފައިވާ ތާރީހަށް ދައްކައި ހަލާސްކުރާނެ ކަމަށް، މިއަހަރުގެ މެއި މަހުގެ 11 ވަނަ ދުވަހު ރައީސް އޮފީހުގައި ބޭއްވި ޕްރެސް ކޮންފަރެންސްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ކުރިން އިއުލާންކުރައްވާފައެވެ.
މި ފެސިލިޓީގެ ދަށުން ދައްކަންޖެހޭ 150 މިލިއަން ޑޮލަރު މި ސަރުކާރުން ދައްކާފައިވަނީ އެކި މަރުހަލާތަކަށް ބަހާލައިގެންނެވެ. އެގޮތުން 2024 ޖެނުއަރީގައި 50 މިލިއަން ޑޮލަރު އަދި މިއަހަރުގެ މެއި މަހު 50 މިލިއަން ޑޮލަރު ދައްކާފައިވާއިރު، މިހާރު ދެއްކި 50 މިލިއަން ޑޮލަރުގެ ފަހު އިންސްޓޯލްމަންޓާއެކު މި ފައިސާ ވަނީ އެއްކޮށް ދައްކާ ހަލާސްކޮށްފައެވެ.
އެންމެ ފަހުން ދެއްކި 50 މިލިއަން ޑޮލަރާއެކު، 2019 ގައި އެސްބީއައި މެދުވެރިކޮށް ނެގި 150 މިލިއަން ޑޮލަރުގެ ޓީ-ބިލްގެ މުޅި ދަރަނި ސަރުކާރުން މިހާރު ވަނީ އެއްކޮށް ހަލާސްކޮށްފައެވެ.
މިޚަބަރާއިމެދު ދެކެނީ ކިހިނެއް؟
+1
+1
+1
1
+1
+1
