ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ފަތިފުށާއި މަތިފުށްވެސް ވަރަށް ރަނގަޅަށް އެނގިވަޑައިގަންނަވާ ކަމަށާއި، އެމަނިކުފާނަށް ދެން ދެއްވާނެ އިތުރު ރައްދެއް ނެތް ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީއެންސީގެ މަތީ މަޖިލީހުގެ ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ، ޔާމީން ދައްކަވާ ވާހަކަތަކަށް ޖަވާބުދާރީވުމަށްވުރެ ގައުމުގެ ތަރައްގީއަށް ކުރަންހުރި މަސައްކަތްތައް މާ ގިނަ ކަމަށެވެ.ކޮންގްރެސް ނިންމުމުގެ ރަސްމިއްޔާތުގައި ވާހަކަދައްކަވަމުން އަބްދުއްރަހީމް ވިދާޅުވީ، ހަގީގީ އިގްތިސާދީ މާހިރުންނަކީ ގައުމުގެ އިގްތިސާދު ނާޒުކު ހާލަތަކަށް ދާ ވަގުތު ހަރުދަނާ ސިޔާސަތުތަކާއެކު އަމަލީ ގޮތުން ނަތީޖާ ނެރެދޭ ބޭފުޅުން ކަމަށެވެ. އަދި ގޭގެ ސިޓިންރޫމުގައި އިނދެގެން އެހެން މީހުން ކުރާ ކަންކަމަށް ފާޑުކިޔައި، ތިމާއަކީ އިގްތިސާދީ މާހިރެކޭ ބުނުމުން އެކަން ގަބޫލުނުކުރެވޭނެ ކަމަށް ވިދާޅުވަމުން އަބްދުއްރަހީމް ވަނީ ކުރީގެ ރައީސް ޔާމީނަށް ވަރަށް ބޮޑަށް ރައްދުދެއްވާފައެވެ.
އަބްދުއްރަހީމް ވިދާޅުވީ، 1993 ވަނަ އަހަރުން ފެށިގެން އެކީގައި މަސައްކަތް ކޮށްފައިވުމުން ރައީސް ޔާމީންގެ ހުރިހާ ފަތިފުށަކާއި މަތިފުށެއް ވަރަށް ރަނގަޅަށް އެނގިވަޑައިގަންނަވާ ކަމަށެވެ. އެހެންކަމުން އެބޭފުޅުންނަށް ނޭނގޭ ހަގީގަތެއް އެނގޭނެ މީހަކު ނުވަތަ އެބޭފުޅުންނަށް ނުދެވޭނެ އިތުރު ރައްދެއް ދެވޭނެ އެހެން މީހަކު މިހާރު ނޫޅޭނެ ކަމަށްވެސް އޭނާ ވިދާޅުވިއެވެ.
އޭނާ ފާހަގަކުރެއްވި ގޮތުގައި ގައުމީ ވަފާތެރިކަމަކީ ގައުމުގެ މިނިވަންކަމާއި ރައްކާތެރިކަން ހިމާޔަތްކުރުމުގައި އެއްބާރުލުން ދިނުމެވެ. އަދި ރައްޔިތުންގެ ހެވަށްޓަކައި ކުރާ އެއްވެސް ކަމަކަށް ހުރަސް ނޭޅުމަކީ ހަގީގީ އިހްލާސްތެރިކަން ކަމުގައިވެސް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވި ގޮތުގައި ގައުމަށް ވަފާތެރިވުމުގެ މާނައަކީ ގައުމުގެ އަމާންކަމާއި މިނިވަންކަން ދެމެހެއްޓުމަށް އެއްބާރުލުން ދިނުމެވެ. އަދި ރައްޔިތުންގެ ހެވާއި ލާބައަށްޓަކައި ހިނގާ މަޝްރޫއުތަކަށް ހުރަސް ނޭޅުމަކީ އިހްލާސްތެރިކަމުގެ ސިފައެއް ކަމަށް ވިދާޅުވަމުން، ޕާޓީގެ ސަފުތައް ބަދަހިކަންމަތީ ބޭއްވުމަށް ހުރިހާ މެންބަރުންގެ ކިބައިން އޭނާ އެދިވަޑައިގަތްއެވެ.
