ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އެކަތިގަނޑެއްގެ ގޮތުގައި ކުރިއަށް ދިއުމަކީ ދިވެހި ގައުމަށް އެންމެ ފައިދާހުރި އަދި އެންމެ ރަނގަޅު ގޮތް ކަމަށް ޕާޓީގެ ރައީސް، ރައީސުލްޖުމުހިރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ އެތެރޭގެ އިންތިހާބުން ހޮވުނު އާ ލީޑަޝިޕާއި އެކި ގޮފިތަކުގެ އިސްވެރިން މަގާމުގެ ހުވާކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ޕާޓީގެ އެތެރޭގެ ބަދަހިކަމަކީ ގައުމީ ތަރައްގީއާއި ހަމަޖެހުން ދެމެހެއްޓުމަށް ލިބޭ އެންމެ ބޮޑު ބާރު ކަމަށެވެ.
ރައީސް ވިދާޅުވި ގޮތުގައި، ޕީއެންސީއަކީ އަބަދުވެސް “ޤައުމު ފުރަތަމަ” އިސްކުރާ ބިނާކުރަނިވި ފިކުރެކެވެ. ނަމަވެސް އިދިކޮޅު ޕާޓީތަކުން ފެންނަނީ ޤައުމު ހަލާކުކޮށްލުމުގެ ވިސްނުން ކަމަށާއި، ވޭތުވެދިޔަ ތަނުގައި ކަން ހިނގާފައިވާ ގޮތާއި މިހާރު ކަންކަން ބަދަލުވަމުންދާ ގޮތާ މެދު ރައްޔިތުން އަމިއްލައަށް ވިސްނާލުމުން މި ދެ ފިކުރުގެ ތަފާތު ވަރަށް ސާފުކޮށް ފެންނަން އޮތް ކަމަށް އެމަނިކުފާނު ފާހަގަކުރެއްވިއެވެ.
“އެންމެ ފުރަތަމަ ޤައުމު ނޫން ގޮތެއް ނެތް. އެހެންވީމާ އޮތީ ޕީއެންސީއާއެކު ކުރިއަށް ދިއުން. އެއީ ޤައުމަށް އެންމެ ފައިދާހުރި ގޮތް.”
ރައީސް ވިދާޅުވީ ޕީއެންސީ އަބަދުވެސް ދެމިއޮންނާނީ އެ ފަލްސަފާގެ މަތީގައި ކަމަށާއި، ޕާޓީގެ ސަފުތައް ބަދަހިވެ، އެތެރޭގައި އެކުވެރިކަން އޮތް ސަބަބަކީވެސް އެއީ ކަމަށެވެ. އެހެންކަމުން ޕީއެންސީއާއި އިދިކޮޅު ފިކުރުތަކުގެ ތަފާތުތައް އަޅާކިޔުމަށް އެދިވަޑައިގަންނަވަމުން ރައީސް ވިދާޅުވީ، ވޭތުވެދިޔަ އަހަރުތަކުގެ ސިޔާސީ އޮއިވަރުތަކަށް ވިސްނާލުމުން ޕީއެންސީއަކީ އަދުލުވެރިކަމާއި، އިންސާފާއި، އިހްލާސްތެރިކަން އިސްކުރާ، އަދި ގައުމަށް އެންމެ ފައިދާހުރި ބިނާކުރުނިވި ހަމައެކަނި ޕާޓީކަން ސާފުވާނެ ކަމަށެވެ.
ރައީސް ވިދާޅުވި ގޮތުގައި އެމަނިކުފާނުގެ އެންމެ ބޮޑު އަމާޒަކީ ދިވެހީންގެ މެދުގައި އޮތް ރީތި އާދަކާދަތަކާއި، ހާއްސަކޮށް އެކަކު އަނެކަކަށް އިހްތިރާމްކުރުމުގެ މާތް ސިފަ އަލުން ދިރުވައި އާލާކުރުމެވެ. ނަމަވެސް، ހަލާކުވެފައިވާ އިޖުތިމާއީ މިންގަނޑުތައް ރަނގަޅުކުރަން ކުރާ މަސައްކަތުގައި ޕީއެންސީ ފިޔަވައި އެހެން އެއްވެސް ސިޔާސީ ޕާޓީއަކުން އެއްބާރުލުން ނުދޭކަން ފާހަގަކުރައްވައި، އެފަދަ ބަޔަކީ ރައްޔިތުންނަށް ހެޔޮއެދޭ ބައެއްގެ ގޮތުގައި ނުބެލެވޭނެ ކަމަށް އެމަނިކުފާނު ވިދާޅުވިއެވެ. މީގެއިތުރުން، ގައުމަށް އެންމެ ފައިދާހުރި ގޮތަށް ކަންކަން ނިންމުމުގެ ސަބަބުން ސިޔާސީ ތާއީދު ގެއްލުނު ކަމުގައި ވިޔަސް، އެކަމާ މެދު އެއްވެސް ޖެހިލުމެއް ނެތް ކަމަށް ރައީސް ވިދާޅުވިއެވެ.
