50 މިލިއަން ޑޮލަރުގެ ޓީ-ބިލެއް ދައްކައި ހަލާސްކޮށްފި؛ ތެލާއި، ކާޑާއި ބޭސް މެދުނުކެނޑި ލިބޭނެ: މާލީ ވުޒާރާ

ފިނޭންސް މިނިސްޓްރީން ހާމަކުރި ގޮތުގައި، މި ދަރަނި ދެއްކުމުގެ ސަބަބުން ރާއްޖެއަށް ބޭނުންވާ ޒަރޫރީ މުދާ އެތެރެކުރުމަށް ބޭނުންވާ ބޭރު ފައިސާ ހޯދުމުގައި އެއްވެސް ދަތިކަމެއް ކުރިމައްޗެއް ނުވާނެއެވެ. އަދި ތެލާއި، ކާޑުގެ ބާވަތްތަކާއި، ބޭހުގެ އިތުރުން އަސާސީ ޚިދުމަތްތައް މެދުނުކެނޑި ފޯރުކޮށްދިނުމަކީ ސަރުކާރުގެ އެންމެ ބޮޑު އިސްކަމެވެ. އެހެންކަމުން، މި ފައިސާ ދެއްކުމާ ގުޅިގެން މުދާ އެތެރެކުރުމަށް ހުރަސްތަކެއް ކުރިމަތިވެދާނެ ކަމަށް ބުނެ ބައެއް ފަރާތްތަކުން ފަތުރަމުންދަނީ އެއްވެސް ހަގީގަތެއް ނެތް ވާހަކަތަކެއް ކަމަށް ބުނެ އެ ވުޒާރާއިން ވަނީ އެކަން ހަރުކަށި އިބާރާތުން ދޮގުކޮށްފައެވެ.

ދައުލަތުގެ ދަރަނި މެނޭޖުކުރުމުގެ ސިޔާސަތާ ގުޅޭގޮތުން ފިނޭންސް މިނިސްޓްރީން ބުނީ، ދަރަނި އަދާކުރަންޖެހޭ މުއްދަތުތަކަށް ސަރުކާރުން ދުރާލައި ވަރަށް ބޮޑަށް ރާވައި، ފުރިހަމައަށް ތައްޔާރުވަމުން އަންނަ ކަމަށެވެ. އަދި ކުރިއަށް އޮތް ތަނުގައި ދައްކަން ހުންނަ ދަރަނިތަކަށް ހާއްސަކޮށްގެން، ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ގަވާއިދުން ފައިސާ ޖަމާކުރުމުގެ މަސައްކަތް ހުއްޓުމެއްނެތި ކުރިއަށްދާ ކަމަށްވެސް އެ ވުޒާރާއިން ހާމަކުރެއެވެ.