މާލެ ސަރަހއްދުގެ ދަތުރުފަތުރުގެ ނިޒާމަށް ތައާރަފުކުރި “މާލެ ޓެކްސީ ލައިން” މޯބައިލް އެޕްލިކޭޝަނަށް އާންމުންގެ ބޮޑު ތަރުހީބެއް ލިބި، ފާއިތުވީ ތިން މަސްދުވަހުގެ ތެރޭގައި 157،000 އަށްވުރެ ގިނަ ދަތުރު ކާމިޔާބުކަމާއެކު ނިންމާލައިފި އެވެ.
އެމްޓީސީސީން ހާމަކުރި އެންމެ ފަހުގެ ތަފާސްހިސާބުތަކަށް ބަލާއިރު، މި އެޕްލިކޭޝަން ތައާރަފުކުރި ފަހުން ވޭތުވެދިޔަ ތިން މަސްދުވަހުގެ ތެރޭގައި ޖުމްލަ 157,971 ދަތުރު ވަނީ ކާމިޔާބުކަމާއެކު ނިންމާލާފައެވެ.މާލެ ސަރަހައްދުގެ ދަތުރުފަތުރުގެ ދަތިތަކަށް ހައްލެއް ހޯދައިދިނުމަށް ސަރުކާރުން ފެށި މި ހިދުމަތް ބޭނުންކުރުމަށް މިހާތަނަށް 52,000 އަށްވުރެ ގިނަ ކަސްޓަމަރުން ވަނީ ރަޖިސްޓްރީވެފައެވެ. މިއަހަރުގެ އޭޕްރީލް މަހު ވެބްސައިޓެއް މެދުވެރިކޮށް ފުރަތަމަ މި ހިދުމަތް ފެށި ނަމަވެސް، ޖޫން މަހުގެ 2 ވަނަ ދުވަހު މޯބައިލް އެޕްލިކޭޝަން ތައާރަފުކުރުމާއެކު، ހިދުމަތް ހޯދާ މީހުންގެ އަދަދު ވަނީ ވަރަށް ބޮޑަށް އިތުރުވެގެން ގޮސްފައެވެ.
