ދިވެހިރާއްޖެއިން ކަނޑުމަގުން ކުރާ ވިޔަފާރީގެ ދަތުރުފަތުރުތަކުގެ ރައްކާތެރިކަން ދެމެހެއްޓުމަށާއި މެރިޓައިމް ސެކިއުރިޓީ ވަރުގަދަކުރުމަށް ސައުދީ އަރަބިއްޔާއިން އުފެއްދި “މަލްޓިނޭޝަނަލް މެރިޓައިމް ޑިފެންސް ކޯލިޝަން” ގެ ޗާޓަރުގައި ރަސްމީކޮށް ސޮއިކޮށްފިއެވެ.
މި އެއްބަސްވުމުގައި ރާއްޖެއިން ސޮއިކުރުމުގެ ރަސްމިއްޔާތު ކުރިއަށްދިޔައީ ބަންޑާރަކޮށީގައި ބޭއްވުނު ހާއްސަ ބައްދަލުވުމެއްގައެވެ. ދިވެހިރާއްޖޭގެ ފަރާތުން މި ކޯލިޝަންގެ ޗާޓަރުގައި ސޮއިކުރެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ހިލްމީއެވެ.
ދިފާއީ ވުޒާރާއިން ފާހަގަކުރެއްވި ގޮތުގައި، ބައިނަލްއަގުވާމީ ގާނޫނުތަކާއި އދ. ގެ އުސޫލުތަކަށް އިހުތިރާމްކޮށްގެން އުފެއްދި މި އިއްތިހާދުގެ މައިގަނޑު އަމާޒަކީ ކަނޑުގެ ދަތުރުފަތުރުގެ މަގުތައް ރައްކާތެރިކޮށް، ގައުމުތަކުގެ ސަލާމަތާއި އިގުތިސާދީ މަސްލަހަތުތައް ދެމެހެއްޓުމެވެ. ހާއްސަކޮށް ވިޔަފާރިއާއި ހަކަތަ ފޯރުކޮށްދޭ މުހިންމު ސަރަހައްދުތައް ކަމަށްވާ ބާބިލް މަންދެބް ކަނޑުއޮޅި، ރަތްކަނޑު އަދި ގަލްފް އޮފް އެޑަން ހިމާޔަތްކޮށް، އެ ސަރަހައްދުތަކުން ދަތުރުކުރާ އުޅަނދުތަކަށް މިނިވަންކަމާއެކު ދަތުރުކުރުމުގެ ފުރުސަތު ކަށަވަރުކޮށްދިނުމާއެކު، ބައިނަލްއަގުވާމީ ވިޔަފާރި މަގުތަކުގެ ސެކިއުރިޓީ ވަރުގަދަކުރުން މި ކޯލިޝަނުގެ މަގުސަދުތަކުގެ ތެރޭގައި ހިމެނެއެވެ.
މި އިއްތިހާދުގައި ރާއްޖެއިން ބައިވެރިވުމުން، ދެ ގައުމުގެ ދެމެދުގައި އޮތް ޒަމާންވީ އެކުވެރިކަން އިތުރަށް ހަރުދަނާވެގެންދާނެއެވެ. މީގެއިތުރުން ރާއްޖެއަށް ބޭނުންވާ މުދާ އެތެރެކުރާ މައިގަނޑު ކަނޑުގެ ސަރަހައްދުތަކުގެ ސަލާމަތްތެރިކަން ކަށަވަރުކުރުމަށާއި، ބައިނަލްއަގުވާމީ މައިދާނުގައި ރާއްޖޭގެ މަސްލަހަތުތައް ހިމާޔަތްކުރަން ކުރާ މަސައްކަތްތަކަށް ބޮޑު އެހީތެރިކަމެއް ލިބިގެންދާނެ ކަމަށްވެސް އެ ވުޒާރާއިން ވިދާޅުވެއެވެ.
މިޚަބަރާއިމެދު ދެކެނީ ކިހިނެއް؟
+1
+1
+1
+1
+1
