ދިވެހިރާއްޖެއަށް ހަގީގީ ތަރައްގީއާއި ހަމަޖެހުން ގެނެސް، ރައްޔިތުންނަކީ ފުދުންތެރި ބަޔަކަށް ހެދޭނީ މަދުވެގެން 10 އަހަރު ދުވަހު އެއް ވެރިޔަކު ގައުމުގެ ވެރިކަމުގައި ހުންނަވައިގެން ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ސެކްރެޓަރީ ޖެނެރަލް އަބްދުއްރަހީމް އަބްދު ﷲ ވިދާޅުވެއްޖެއެވެ.
ޕީއެންސީގެ މަތީ މަޖިލިސް ހުޅުވުމުގެ ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ، ސިޔާސީ ޕާޓީއެއް އުފެދުމުގެ އަސާސީ ބޭނުމަކީ ވެރިކަން ކުރުން ކަމަށާއި، ވެރިކަމުގައި ނެތް ނަމަ ސަރުކާރު ޒިންމާދާރުކުރުވުން ކަމަށެވެ. އެމަނިކުފާނު ފާހަގަކުރެއްވި ގޮތުގައި، ޕީއެންސީގެ އަމާޒަކީ ބޭރުގެ އެއްވެސް ނުފޫޒެއް ނެތް، އަމިއްލަ ފައިމައްޗަށް ތެދުވެފައިވާ، އަދި ދިވެހިންގެ އަމިއްލަ ނިންމުންތައް އަމިއްލައަށް ނިންމާ ‘ދިވެހިންގެރާއްޖެ’ އެއް ބިނާކުރުމެވެ. މީގެއިތުރުން، އެ ޕާޓީން މަސައްކަތް ކުރަނީ އަނިޔާވެރިކަމުން އެއްކިބާވެފައިވާ، އިންސާފު ގާއިމުވެފައިވާ، އަދި ވޭތުވެދިޔަ 900 އަށްވުރެ ގިނަ އަހަރު ފަދައިން އިސްލާމްދީނުގެ މަތިވެރި އަސާސްތަކުގެ މަތީގައި ސާބިތުވެއޮތް ގައުމެއްގެ ގޮތުގައި ރާއްޖެ ބޭއްވުމަށް ކަމުގެ ޔަގީންކަން ދެއްވިއެވެ.
މިޚަބަރާއިމެދު ދެކެނީ ކިހިނެއް؟
+1
+1
+1
+1
+1
