މާލޭގެ މަގުތައް ތޮއްޖެހުން ކުޑަކުރުމަށް ކުޑަ ފީއެއް ދައްކާ ގޮތަށް ހާއްސަ ޕާކިން ޒޯންތަކެއް ހަދަނީ

މާލޭގެ މަގުތައް ތޮއްޖެހުން ކުޑަކުރުމަށްޓަކައި، ކުޑަ ފީއެއް ދައްކައިގެން ބޭނުންކުރެވޭނެ ހާއްސަ ޕާކިން ޒޯންތަކެއް މާލޭގެ އެކި ސަރަހައްދުތަކުގައި ހެދުމަށް ސަރުކާރުން ނިންމައިފާކަން އިގްތިސާދީ ތަރައްގީއާއި ވިޔަފާރިއާ ބެހޭ މިނިސްޓަރު މުހައްމަދު ސައީދު ހާމަކުރައްވައިފި އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒިރު ސައީދު ވިދާޅުވީ މާލޭ ސަރަހައްދުގެ ޓްރެފިކް މައްސަލަ ހައްލުކުރުމަށާއި، ޕާކިން މައްސަލަ ސަރުކާރުން ވަރަށް ގިނަ މަސައްކަތްތަކެއް ކުރަމުން އަންނަ ކަމަށެވެ.މިނިސްޓަރު ފާހަގަކުރެއްވި ގޮތުގައި، ސޯސަން މަގާއި ހީނާމާގެ ބިމުގައި ހުރި ޕާކިން ޒޯންތައް މަލްޓި-ސްޓޯރީ އިމާރާތްތަކަށް ބަދަލުކުރުމުގެ މަސައްކަތް ވަރަށް އަވަހަށް ބަޔަކާ ހަވާލުކުރެވޭނެއެވެ.އެގޮތުން ހީނާމާގޭގައި ޒަމާނީ ޕާކިން ސިސްޓަމެއް ގާއިމުކުރުމަށް ބަޔަކު ހޮވައި، އެ ފަރާތާއެކު އެންމެ ފަހުގެ މަޝްވަރާތައް މިހާރު ކުރިއަށްދާކަން އޭނާ ފާހަގަކުރެއްވިއެވެ.

“މާލޭން ހީނާމާގެ ބިމުގަ ޒަމާނީ ޕާކިން ވަސީލަތެއް ގާއިމު ކުރުމަށްޓަކައި އަޅުގަނޑުމެން ބަޔަކު އައިޑެންޓިފައިކުރެވިފަ، އެ ފަރާތާއެކު ވާހަކަ ދެކެވެމުން މިހާރު މިދަނީ. އިރާދަކުރެއްވިއްޔާ ކުރިއަށް މި އޮތް ހަފްތާ ތެރޭގައި އަޅުގަނޑުމެންނަށް އެއްބަސްވުމަކަށް އާދެވި މަސައްކަތާ ދިމާލަށް އެނބުރިލެވޭނެކަމަށް މި ބަލަނީ.”

ހީނާމާގެ ބިމުގައި ޕާކިން އިމާރާތް އެޅުމުގެ އެއްބަސްވުމުގައި އަންނަ ހަފުތާގައި ސޮއިކުރަން ހަމަޖެހިފައިވާއިރު، ސޯސަން މަގު ޕާކިން ޒޯނުގެ އެއްބަސްވުމުގައި ސޮއިކުރާނީ ފަހުގެ ތާރީހެއްގައި ކަމަށް ވަޒީރު ހާމަކުރެއްވިއެވެ.މި މަޝްރޫއުތައް އަމިއްލަ ކުންފުނިތަކާ ހަވާލުކޮށްގެން ކުރިއަށް ގެންދިޔަ ނަމަވެސް، ޕާކިން އަށް ނަގާނީ އާންމުންނަށް އަތްފޯރާ ފަދަ ކުޑަ ފީއެއް ކަމުގެ ޔަގީންކަން ވަޒީރު ދެއްވިއެވެ.

މާލެ ސަރަހައްދުގެ ޕާކިން މައްސަލައަށް ދާއިމީ ހައްލެއް ގެނައުމަށް ހުޅުމާލެއާއި ވިލިމާލެ ހިމެނޭހެން ޖުމުލަ 7 ޕާކިން އިމާރާތެއް އެޅުމަށް ސަރުކާރުން ވަނީ ނިންމާފައެވެ.ޒީރު ވިދާޅުވި ގޮތުގައި މި އިމާރާތްތަކާއެކު ހަތަރު ފުރޮޅުލީ އުޅަނދުތަކަށް 2,600 އަށްވުރެ ގިނަ ޖާގަ އަދި ސައިކަލްތަކަށް 1,000 ޖާގަ ލިބިގެންދާނެއެވެ، މާލެ ސަރަހައްދުގެ އާބާދީ ބޮޑުވެ، މަގުތައް ތޮއްޖެހުމުގެ މައްސަލައަށް ދާއިމީ ހައްލެއް ހޯދުމަށްޓަކައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިދިޔަ އޮގަސްޓް މަހުގެ ފަހުކޮޅު އާ ލޭންޑް ޓްރާންސްޕޯޓް ގާނޫނު ތަސްދީގު ކުރައްވާފައެވެ.