ސަރުކާރުގެ ކުންފުނިތައް މެދުވެރިކޮށް، ރައްޔިތުންނަށް ސީދާ ފައިދާ ލިބޭ 10 ރިސޯޓެއް ތަރައްގީކުރުމުގެ އަމަލީ މަސައްކަތް މިއަހަރުގެ ނޮވެމްބަރު މަހު ފަށާނެ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ރައީސް ވިދާޅުވީ، ޓޫރިޒަމް ސެކްޓަރ އަކީ ވަކި ބައެއްގެ އެއްޗެއް ނޫން ކަމަށެވެ. އަދި އެއީ ހަމައެކަނި ވަކި ބަޔަކު މުއްސަނދިވާ އެއްޗަކަށް ވެގެންނުވާނެ ކަމަށް ވެސް ރައީސް ވިދާޅުވިއެވެ.އެހެންކަމުން، ދިވެހި ރައްޔިތެއްކަން އަންގައިދޭ ކާޑު އޮތް ކޮންމެ މީހަކަށްމެ އެއްވެސް ތަފާތުކުރުމެއް ނެތް ގޮތަށް މި ސިނާއަތުގެ ފައިދާ ސީދާ ލިބޭނެ ހަރުދަނާ ނިޒާމެއް ގާއިމުކުރުމުގެ މަސައްކަތް ސަރުކާރުން ކުރަމުންދާ ކަމަށް އެމަނިކުފާނު ފާހަގަކުރެއްވިއެވެ.
އެމަނިކުފާނު ވިދާޅުވި ގޮތުގައި މި 10 ރިސޯޓު ހެދުމަށްޓަކައި މާލެ އަތޮޅާއި ރާއްޖޭގެ އެކި އަތޮޅުތަކުން ބޭނުންވާނެ ރަށްތަކާއި ފަޅުތައް ކަނޑައެޅުމުގެ މަސައްކަތް މި ހަފުތާގެ ތެރޭގައި މުޅިން ނިމޭނެއެވެ.އަދި އޭގެ ފަހުން ކުރަންޖެހޭ އެހެނިހެން އިދާރީ ތައްޔާރީތައް ފުރިހަމަކުރުމަށްފަހު، އަންނަ ނޮވެމްބަރު މަހުގެ ތެރޭގައި ބައެއް މަޝްރޫއުތަކުގެ އަމަލީ މަސައްކަތް ފެށޭނެ ކަމުގެ ވަރަށް ބޮޑު އުންމީދެއް އެބައޮތް ކަމަށްވެސް ރައީސް ވިދާޅުވިއެވެ.
ރައީސް އިތުރަށް ފާހަގަކުރެއްވި ގޮތުގައި، މިއީ ހަމައެކަނި ރިޔާސީ ބަޔާނުގައި ހިމަނާލި ވާހަކައެއް ނޫނެވެ. އަދި މި މަޝްރޫއުގެ އަމަލީ މަސައްކަތްތައް ވަރަށް ބާރު މިނެއްގައި ކުރިއަށްދާ ކަމަށް އެމަނިކުފާނު ވިދާޅުވިއެވެ.އެގޮތުން، ކުރިއަށް އޮތް 36 މަސްދުވަހުގެ ނުވަތަ 3 އަހަރުގެ ތެރޭގައި މި ރިސޯޓުތައް ހުޅުވައި ހިދުމަތް ދޭން ފެށޭނެ ކަމަށް އުންމީދު ކުރައްވާ ކަމަށް ރައީސް ވިދާޅުވިއެވެ. މި ބަދަލާއެކު، ކޮންމެ ދިވެހި ރައްޔިތަކީ ވެސް ރިސޯޓުތަކުގެ ހިއްސާދާރަކަށް ބަދަލުވެ، ކޮންމެ މީހެއްގެ ބޭންކް އެކައުންޓަށް ސީދާ ޑޮލަރުން ފައިސާ ޖަމާވާނެ ނިޒާމެއް ފަހިވެގެންދާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވި ގޮތުގައި، މި ރިސޯޓުތަކުން ލިބޭ އާމްދަނީ ސީދާ ދިވެހި ރައްޔިތުންގެ އެކައުންޓްތަކަށް ޖަމާވާން ފަށާނީ 2030 ވަނަ އަހަރު ކަމަށް މިހާރު ވަނީ އަންދާޒާ ކުރެވިފައެވެ.އަދި މިހާތަނަށް ހަދާފައިވާ ހިސާބުތަކަށް ބަލާއިރު، މި މަޝްރޫއުގެ ދަށުން ކޮންމެ ދިވެހި ރައްޔިތަކަށް އަހަރަކު މަދުވެގެން 400 ޑޮލަރު (ގާތްގަނޑަކަށް 6,168 ރުފިޔާ) ލިބޭނެ ކަމަށް ވެސް އެމަނިކުފާނު ހާމަކުރެއްވިއެވެ.
ރައީސް މުއިއްޒުގެ މި ވައުދަކީ ރާއްޖޭގެ ތާރީހުގައިވެސް ފަތުރުވެރިކަމުގެ ސީދާ ނަފާ، އެއްވެސް މެދުވެރިއަކާ ނުލައި، ކޮންމެ ދިވެހި ރައްޔިތެއްގެ އެކައުންޓަށް ސީދާ ބަހާލުމަށް ސަރުކާރަކުން މިހާރު ހުށަހެޅި އެންމެ ބޮޑު އަދި އެންމެ އިގްތިސާދީ ސިޔާސަތެވެ.
މިޚަބަރާއިމެދު ދެކެނީ ކިހިނެއް؟
+1
+1
+1
+1
+1
