މަހެއްގެ މައްޗަށް 60,000 ރުފިޔާއަށް ވުރެ ގިނައިން އާމްދަނީ ލިބޭ މީހުންނަށް އާސަންދައިގެ ފުރިހަމަ ކަވަރޭޖް ނުލިބޭ ގޮތް ހެދުމަށް ނިންމައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވިދާޅުވީ، މިހާރު އާސަންދަ ދެމުންދަނީ އާމްދަނީ މަދުން ލިބޭ މީހުންނާއި ގިނައިން ލިބޭ މީހުންނަށް އެއްވެސް ތަފާތެއް ނެތި އެއް ހަމައެއްގައި ކަމަށެވެ. އަދި މިއީ މިކަން ކުރަން އެންމެ އެކަށީގެންވާ އަދި އިންސާފުވެރި ގޮތް ކަމަށް ގަބޫލުފުޅު ނުކުރައްވާ ކަމަށްވެސް އެމަނިކުފާނު ވިދާޅުވިއެވެ.
“މިހާރު އާސަންދަ މިދެވެނީ އެންމެ މުއްސަނދި މީހާއަށްވެެސް ނިކަމެތި މީހާއަށްވެސް ތަފާތެއް ނެތި. ފުލް ކަވަރޭޖް. އެހެންނަމަވެސް އެއީ އެންމެ ރަނގަޅުގޮތް ކަމަކަށް ބޭރުގެ ފަރާތްތަކެއް ވެސް ގަބޫލެެއް ނުކުރޭ. ފަންނީ ފަރާތްތަކެއް ވެސް. އަދި އަޅުގަނޑުމެންވެސް ގަބޫލެެއް ނުކުރަން. އެހެންކަމުން ކުރިއަށް އޮތް ދުވަސްތަކުގައި60،000 ރުފިޔާ އިން މައްޗަށް މުސާރަ ލިބޭ ފަރާތްތަކަށް މިހާރު މި އޮންނަ ގޮތަށް ފުލް ކަވަރޭޖް އާސަންދައެއް ނުލިބޭނެ.”
“މުއްސަނދިންނަށް އިންކަމް ޓެކްސް ޕޭކުރާ ފަރާތްތައް، މުއްސަނދިންނަށް ކޮންމެހެން އާންމުންނަށް މި ލިބޭ ގޮތަށް ހުރިހާކަމެއް ފްރީކޮށް ލިބޭކަށް ނުޖެހޭ.އިރާދަކުރެވިއްޔާ އެ ބަދަލު މި އަންނަ މަހުން ފެށިގެން ގެނެވޭނެ.”
ކުރިއަށް އޮތް ދުވަސްތަކުގައި މިކަމުގެ ތަފްސީލުތައް އިއުލާނު ކުރާނެ ކަމަށް ރައީސް ވަނީ ވިދާޅުވެފައެވެ. ރައީސްް ވިދާޅުވީ މިކަމުގެ ހެޔޮ ބަދަލުތައް ކޮންމެވެސް ވަރަކަށް މިއަހަރުގެ ތެރޭގައި ވެސް ކުރާނެ ކަމަށެވެ.
