ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގައި ދިމާވެދާނެ ސިއްހީ ކުއްލި ނުރައްކަލުގެ ހާލަތަކަށް ތައްޔާރުވުމުގެ ގޮތުން ޕާޝަލް އިމަޖެންސީ އެކްސަސައިޒެއް ކާމިޔާބު ކަމާއެކު ކުރިއަށް ގެންގޮސްފިއެވެ.
އެޗްޕީއޭއާ ގުޅިގެން ކުރިއަށްގެންދިޔަ މި ހަރަކާތުގެ މައިގަނޑު އަމާޒަކީ، ސިއްހީ ކުއްލި ނުރައްކަލުގެ ހާލަތްތަކުގައި ކަމާބެހޭ މުއައްސަސާތަކުގެ މެދުގައި އޮންނަ ގުޅުން އިތުރަށް ވަރުގަދަކުރުމެވެ.
މި އިމަޖެންސީ ރެސްޕޮންސް ސިމިއުލޭޝަންގައި “ބިއޯންޑް އެއާލައިން” އިން އެހީތެރިކަން ފޯރުކޮށްދިންއިރު، އެއާޕޯޓުގެ އާންމު އޮޕަރޭޝަންތަކަށާއި ޝެޑިއުލް ފްލައިޓްތަކަށް އެއްވެސް ބުރޫއެއް ނާރާ ގޮތަށް މި ތަމްރީނުތައް ނިންމާލެވުމަކީ ލިބުނު ވަރަށް ބޮޑު ކާމިޔާބީއެއް ކަމަށް އެމްއޭސީއެލް އިން ފާހަގަކުރެއެވެ.
ވީއައިއޭގެ ސަލާމަތީ ފިޔަވަޅުތައް ވަރުގަދަކުރުމަށް އެމްއޭސީއެލް އިން ތަފާތު ތަމްރީނުތައް ބާއްވައެވެ. މީގެ ތެރެއިން ރާއްޖޭގެ އޭވިއޭޝަން ދާއިރާގެ އެންމެ ބޮޑު ހަރަކާތަކީ ގަވާއިދުން ބާއްވާ “އެއާޕޯޓް ފުލް ސްކޭލް އިމަޖެންސީ އެކްސަސައިޒް” (އެފެކްސް) އެވެ. މި ބޮޑު ތަމްރީނު އެންމެ ފަހުން ބޭއްވީ މިދިޔަ އަހަރުއެވެ.
