ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޓާމިނަލް 1 ގައި ފަސިންޖަރުން މަޑުކޮށްލައިގެން ތިބުމަށް ހާއްސަ އާ ވެއިޓިން އޭރިއާއެއް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހުޅުވައިފިއެވެ.
އެމްއޭސީއެލްއިން ހާމަކުރި ގޮތުގައި، މި އާ ސަރަހައްދަކީ ދަތުރުވެރިންނަށް އިތުރަށް އަރާމު އަދި ފަސޭހަ މާހައުލެއް ފޯރުކޮށްދީ، ފަސިންޖަރުންނަށް ދޭ ޚިދުމަތްތައް ފުޅާކުރުމަށް ކުރަމުންދާ މަސައްކަތްތަކުގެ ބައެކެވެ. މި ބަދަލާއެކު ޓާމިނަލްގެ ފުރަތަމަ ބުރީގައި ފަސިންޖަރުން މަޑުކުރުމަށް ގާތްގަނޑަކަށް 750 އަކަމީޓަރުގެ ޖާގައެއް ވަނީ އިތުރުކުރެވިފައެވެ.
މި އާ ސަރަހައްދު ފަރުމާކޮށްފައިވަނީ ފްލައިޓަށް އެރުމުގެ ކުރިން ފަސިންޖަރުން މަޑުކޮށްލައިގެން ތިބުމަށް އެކި ބާވަތުގެ ގޮނޑިތަކާ އެކުގައެވެ.
މީގެ އިތުރުން، ކުޑަކުދިން ކުޅުމަށް ހާއްސަކޮށް 136 އަކަމީޓަރުގެ ސަރަހައްދެއް ވެސް މީގެ ތެރޭގައި ހިމެނެއެވެ. މި ތަނުގައި އެކި ފަންގިފިލާތަކަށް ހުންނަ ކުޅޭ އޮނިގަނޑުތަކާއި، ސަލާމަތީ ފާރުތަކާއި، ވާގަނޑާއި ބުރު ބޭނުންކޮށްގެން އަރާނެ ވަސީލަތްތަކުގެ އިތުރުން ބޯޅަ ކޮޅެއް (ބޯލް ޕިޓް) ވެސް ހިމެނެއެވެ.
އެމްއޭސީއެލްއިން ބުނި ގޮތުގައި، މި ސަރަހައްދު ފަރުމާކޮށްފައިވަނީ ކުޑަކުދިންނާއެކު ދަތުރުކުރާ އާއިލާތަކަށް ރައްކާތެރި އަދި ހިތްހަމަޖެހޭ މާހައުލެއް ފޯރުކޮށްދިނުމަށެވެ.
ވެލާނާ އިންޓަނޭޝަނަލް އެއާޕޯޓަކީ ރާއްޖޭގެ އިގްތިސާދުގެ މައި ދޮރާށި ކަމަށްވާއިރު، އެއާޕޯޓުގެ ޚިދުމަތްތަކުގެ ފެންވަރު މަތިކުރުމަށް އެމްއޭސީއެލްއިން ދަނީ ގިނަ މަޝްރޫއުތަކެއް ހިންގަމުންނެވެ. ހާއްސަކޮށް ފަތުރުވެރިންނާއި ދަތުރުވެރިން އިތުރުވަމުންދާ ދަނޑިވަޅެއްގައި، ޓާމިނަލްތަކުގެ ޖާގަ ބޮޑުކުރުމާއި ފަސިންޖަރުންނަށް ބޭނުންވާ ވަސީލަތްތައް ގާއިމުކުރުމަކީ ކުންފުނިން އެންމެ ބޮޑު އިސްކަމެއްދޭ އެއް ކަމެވެ.
މިޚަބަރާއިމެދު ދެކެނީ ކިހިނެއް؟
+1
+1
+1
+1
+1
