ނިމިދިޔަ ލޯކަލް ކައުންސިލް އިންތިހާބުގައި އިދިކޮޅު އެމްޑީޕީގެ ޓިކެޓުގައި ވާދަކޮށް، އދ. މަންދޫ ކައުންސިލްގެ އަންހެން މެންބަރު ކަމަށް އިންތިޚާބުވި ޝަހީމާ ޝިހާބު، ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ސޮއިކޮށްފިއެވެ.
ޕީއެންސީން މިއަދު ބޭއްވި ނޫސްވެރިންގެ ބައްދަލުވުމެއްގައި މިކަން އިއުލާން ކުރައްވަމުން އެ ޕާޓީގެ ޕީޖީ ލީޑަރު އިބްރާހިމް ފަލާހު ވިދާޅުވީ، ޝަހީމާ ޕީއެންސީއާ ގުޅިވަޑައިގަތުމަށް ނިންމެވި ނިންމެވުމަށް ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުހައްމަދު މުއިއްޒު މަރުހަބާ ވިދާޅުވެފައިވާ ކަމަށެވެ.
ޕީއެންސީއާ ގުޅުމަށްފަހު ޝަހީމާ ވިދާޅުވީ، އެ ނިންމުމަކީ ރަށުގެ ތަރައްގީއަށްޓަކައި ނިންމެވި ނިންމުމެއް ކަމަށާއި ރަށުގެ ތަރައްގީއަށްޓަކައި ސަރުކާރާއެކު ގާތުން މަސައްކަތް ކުރުމުގެ ބޭނުމުގައި ކަމަށެވެ. އަދި އޭނާއަކީ އަބަދުވެސް ރަށުގެ ކުރިއެރުމަށް މަސައްކަތް ކުރަން ބޭނުންވާ ފަރާތެއް ކަމަށާއި، މި ނިންމުމަކީ އެ މަގްސަދުގައި ނިންމި ނިންމުމެއް ކަމަށްވެސް ޝަހީމާ ފާހަގަކުރިއެވެ.
“އަޅުގަނޑޫ އެމްޑީޕީ ޓިކެޓުގައި ނުކުމެ ޕީއެންސީއާ ގުޅިގެން، މިހާޜުގެ ސަރުކާރާ ގުޅިގެން އަޅުގަނޑު މަސައްކަތްކުރަން ބޭނުންވާތީވެ، އަދި އަޅުގަނޑުމެންނަށް މިކަމުގައި ކުރިޔަށް ދެވޭނީވެސް ސަރުކާރާއި ގުޅިގެން ކަމަށްވާތީ އެބޭފުޅުންނާއި ގުޅިގެން ރަށުގެ ތަރައްގީއަށް މަސައްކަތްކުރަން ބޭނުންވާ މީހަކަށްވާތީ ކުރީގަވެސް، މިހާރުވެސ،ް އަޅުގަނޑު ޕީއެންސީއާ ގުޅުނީ. އަޅުގަނޑޫގެ ރަށަށް ފައިދާވާނެ ކަންތައްތައް ކުރުމަށްޓަކައި ވެރިފަރާތާއި ގުޅިގެން މަސައްކަތް ކުރުމަށްޓަކައި ޕާޓީއާ ގުޅުނީ.” ޝަހީމާ ވިދާޅުވިއެވެ.
ޝަހީމާގެ މި ނިންމުމާއެކު، މަންދޫ ކައުންސިލްގެ އަޣުލަބިއްޔަތު މިހާރު ވަނީ ޕީއެންސީއަށް ލިބިފައެވެ. އެ ކައުންސިލަށް ދެން އިންތިޚާބުވެފައިވަނީ ޕީއެންސީގެ ޓިކެޓުގައި ވާދަކުރި އައްބާސް ސައުދުއެވެ. ޝަހީމާ ޕާޓީ ބަދަލުކުރުމާއެކު ކައުންސިލްގެ ދެ މެންބަރުންނަކީވެސް މިހާރު ޕީއެންސީގެ މެންބަރުންނެވެ.
މި މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިހާބުގައި މަންދޫ ކައުންސިލްގެ އަންހެން މެންބަރުގެ ގޮނޑި ޝަހީމާ ކާމިޔާބު ކުރީ 150 ވޯޓު ހޯދައިގެންނެވެ. އޭނާއާ ވާދަކުރި ޕީއެންސީގެ ކެންޑިޑޭޓް އައިޝަތު ޝެހެނާޒަށް ލިބުނީ 112 ވޯޓެވެ.
