މާލެ ސިޓީގައި 500 ސޯޝަލް ހައުސިންގް ޔުނިޓް ތަރައްގީކުރުމަށް ދިވެހި ސަރުކާރާއި ޗައިނާ ސަރުކާރާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ ޗައިނާގެ ވެރިރަށް ބެއިޖިންގައި މިދިޔަ އަންގާރަ އަދި ބުދަ ދުވަހު ކުރިއަށްދިޔަ “ތާޑް ހައި-ލެވެލް ކޮންފަރެންސް އޮން ގްލޯބަލް އެކްޝަން ފޯ ޝެއާޑް ޑިވެލޮޕްމަންޓް” ކޮންފަރެންސްގެ ހަވާސާގައެވެ. ހައުސިންގް އެންޑް އިންފްރާސްޓްރަކްޗާ މިނިސްޓްރީން ހާމަކުރި ގޮތުގައި، މި މަޝްރޫއަކީ މާލޭގެ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވަމުން ގެންދަވާ މަސައްކަތްޕުޅުގެ ދަށުން ކުރިއަށްދާ މަޝްރޫއެކެވެ.
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ހައުސިންގް މިނިސްޓްރީގެ ސްޓޭޓް މިނިސްޓަރު އިބްރާހީމް ތޯޢާމް މުޙައްމަދެވެ. ޗައިނާ ސަރުކާރުގެ ފަރާތުން ސޮއިކުރެއްވީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސީއައިޑީސީއޭ) ގެ ވައިސް ޗެއާމަން ލިއު ޖުންފެންއެވެ.
During the Third High-Level Conference on Global Action for Shared Development, held in Beijing from 21–22 April 2026, the Government of the Maldives, on the sidelines of the conference, signed the minutes of a meeting with the Government of the People’s Republic of China for the… pic.twitter.com/eAGiGNSd2w
— Ministry of Infrastructure, Housing and Urban Dev. (@MIHUDmv) April 25, 2026
މި މަޝްރޫއުގެ އެންމެ ފާހަގަކޮށްލެވޭ އެއް ކަމަކީ، މިއީ އެއްވެސް އިންޓަރެސްޓަކާ ނުލައި (އިންޓަރެސްޓް ފްރީ ފެސިލިޓީއެއްގެ ދަށުން) ޗައިނާ ސަރުކާރުން ފޯރުކޮށްދޭ ފައިސާއިން ހިންގުމަށް ހަމަޖެހިފައިވާ މަޝްރޫއަކަށް ވުމެވެ. މީގެ އިތުރުން، ޗައިނާގެ އެހީގައި ރާއްޖޭގައި ކުރިއަށްގެންދާ ތަރައްގީގެ އެހެނިހެން މަޝްރޫއުތަކާ ގުޅޭގޮތުން ވެސް މި ދަތުރުފުޅުގެ ތެރެއިން ވަނީ ފުޅާ ދާއިރާއެއްގައި މަޝްވަރާކޮށްފައެވެ.
މި ބައްދަލުވުންތަކުގައި ދެ ގައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކޮށް، ތަރައްގީގެ މަޝްރޫއުތައް ހަލުވިކަމާއެކު ކުރިއަށް ގެންދިއުމުގެ ޔަގީންކަން ޗައިނާ ސަރުކާރުން ވަނީ ދީފައެވެ. މިއީ ރާއްޖޭގެ އުމްރާނީ ތަރައްގީއަށާއި ރައްޔިތުންގެ އިޖުތިމާއީ ފުދުންތެރިކަން އިތުރުކުރުމަށް ދެ ގައުމުން ކުރަމުންދާ މަސައްކަތުގެ މުހިންމު ފިޔަވަޅެއްގެ ގޮތުގައި ހައުސިންގް މިނިސްޓްރީން ސިފަކުރެއެވެ.
