މާލޭގެ ބޮޑުތަކުރުފާނު މަގުގެ ސެގްމަންޓް 1 ގެ ޝީޓް ޕައިލް ކުރުމުގެ މަސައްކަތް ފެށުމަށްޓަކައި، އެ ސަރަހައްދުގެ ބައެއް މަގުތަކާއި ފަޅު ބަންދުކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ނިންމައިފިއެވެ.
އެމްޓީސީސީން އިއްޔެ ނެރުނު އިޢުލާނެއްގައި ބުނެފައިވަނީ، ބޮޑުތަކުރުފާނު މަގުގެ ސެގްމަންޓް 1 ގެ ފޭސް 2 އިން ފެށިގެން 4 އާ ހަމައަށް ޝީޓް ޕައިލް ކުރުމުގެ މަސައްކަތް ފެށުމަށް މިހާރު ތައްޔާރުވެފައިވާ ކަމަށެވެ. މި މުހިންމު މަޝްރޫޢުގެ ދަށުން ކުރިއަށްދާ މި މަސައްކަތަށްޓަކައި، މިއަދުން ފެށިގެން އަންނަ ޖުލައި މަހުގެ 4 ވަނަ ދުވަހުގެ ނިޔަލަށް އެ ސަރަހައްދުގެ ބައެއް ބަންދުކުރުމަށް ވަނީ ހަމަޖެހިފައެވެ.
މި މުއްދަތުގެ ތެރޭގައި ބަންދުކުރުމަށް ހަމަޖެހިފައިވަނީ މާލޭ މަސްވެރިންގެ ޕާކުން ފެށިގެން ބޭންކް އޮފް މޯލްޑިވްސްއާ ހަމައަށް އޮންނަ މަގާއި، އެ މަގާ އިންވެގެން އޮންނަ ފަޅު ސަރަހައްދެވެ. އެހެންކަމުން، ބަންދުކުރެވޭ ފަޅު ސަރަހައްދުގައި މިވަގުތު އަޅާފައި ހުރި ދޯނިފަހަރާއި ލޯންޗުތައް ވީ އެންމެ އަވަހަކަށް އެ ސަރަހައްދުން ނަގައި، ފަޅު ހުސްކޮށްދިނުމަށް އެ ތަކެތީގެ ވެރިފަރާތްތަކަށް އެމްޓީސީސީން ވަނީ އިލްތިމާސްކޮށްފައެވެ.
މި މަސައްކަތުގެ ސަބަބުން މަގު ބަންދުކުރަން ޖެހުމާ ގުޅިގެން އާންމު ރައްޔިތުންނަށް ދިމާވެދާނެ ދަތިތަކަށް އެމްޓީސީސީން ވަނީ މަޢާފަށް އެދިފައެވެ. އަދި މި މަޝްރޫޢާ ގުޅޭގޮތުން އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން އެ ކުންފުނީގެ ހޮޓްލައިން ނަންބަރު 1650 އަށް ގުޅުއްވުމަށް އެމްޓީސީސީން އެދިފައިވެއެވެ.
ބޮޑުތަކުރުފާނު މަގު ތަރައްޤީކުރުމުގެ މި މަޝްރޫޢަކީ މާލޭގެ އިންފްރާސްޓްރަކްޗަރ ވަރުގަދަކޮށް، ދަތުރުފަތުރަށް ލުއިފަސޭހަކަން ހޯދައިދިނުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.
