ސްްރީލަންކާގެ ކޮލަމްބޯ ބަނދަރުގައި ތާށިވެފައިވާ ކޮންޓެއިނަރުތަކުގެ ސަބަބުން ރާއްޖޭގެ ބާޒާރަށް ދިމާވެދާނެ ދަތިތަކުން ސަލާމަތްވުމަށްޓަކައި، 80 ކޮންޓެއިނަރެއް އަވަހަށް ރާއްޖެ ގެނައުމުގެ މަސައްކަތް ސަރުކާރުން ފަށައިފި އެވެ.
މިކަން ހާމަކުރެއްވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިގްތިސާދީ ތަރައްގީ އާއި ވިޔަފާރިއާ ބެހޭ ވަޒީރު މުހައްމަދު ސައީދުއެވެ.
ވަޒީރު ސައީދު ވިދާޅުވި ގޮތުގައި، ކޮލަމްބޯ އާއި ރާއްޖެއާ ދެމެދު މުދާ އުފުލުމުގެ ދަތުރުތައް ކުރިއަށް ދިޔަ ނަމަވެސް، އެކި ސަބަބުތަކާ ހުރެ ބައެއް ކޮންޓެއިނަރުތައް ލިބުން ވަނީ ލަސްވެފައެވެ. މިހާތަނަށް ޖުމްލަ 4،200 ކޮންޓެއިނަރު ލަންކާގައި ތާށިވެފައިވާކަން ވަޒީރު ފާހަގަކުރެއްވިއެވެ. މީގެ ތެރޭގައި ވަކި ބާވަތެއްގެ މުދާ މަޑުޖެހިފައި ހުރުމުގެ ސަބަބުން ރާއްޖޭގެ މާކެޓަށް އޭގެ ސަބަބުން ދިމާވެދާނެ ގޮންޖެހުންތަކަށް ރިއާޔަތްކޮށް، އެފަދަ މުދާ ރާއްޖެ ގެނައުމުގެ މަސައްކަތް އަވަސް ކުރައްވަމުންދާ ކަމަށް ވިދާޅުވިއެވެ.
ބާޒާރުގައި މުދާ ހުސްވިޔަނުދީ ހިފެހެއްޓުމަށްޓަކައި ސަރުކާރުން މިހާރު އިސްކަންދެމުންދަނީ އެންމެ ބޭނުންތެރި މުދާ ހުރި ކޮންޓެއިނަރުތައް އަވަހަށް ގެނައުމަށެވެ. އެގޮތުން، ބާޒާރުގެ ވިޔަފާރިވެރިންގެ ފަރާތުން ލިބުނު މައުލޫމާތަށް ބިނާކޮށް، ސަންފްލާވާ ތެލާއި ކިރު ހިމެނޭހެން 80 ކޮންޓެއިނަރެއް އަވަސްކޮށްދިނުމަށް ލަންކާގެ ކަމާގުޅުންހުރި އިދާރާތަކުގައި ވަނީ އެދިފައެވެ.
“މިއަދު ހެނދުނު ވިދާޅުވި ދެ ޕްރޮޑަކްޓެއް އަވަސްކުރަން ބާޒާރުން އަޅުގަނޑުމެންނަށް ރެކުއެސްޓް ކޮށްފައިއެބައިނޭ. އެހެންވެ އެ ދެބާވަތްވެސް އަޅުގަނޑުމެން މިދަނީ އަވަސްކުރަމުން. އޭގެ ތެރޭގައި އެސެންޝިއަލް އައިޓަމްސްގެ ތެރޭގައި ހިމެނޭ، މާނައަކީ 164 ބާވަތެއްގެ އައިޓަމްގެ ތެރޭގައި ހިމެނޭ ބާވަތެއް ވީމަ ވަރަށް ބޮޑަށް އެ މުދާ ގެނައުމުގެ، މާނައަކީ އެހެން ކަންތައްތަކަށްވުރެ ބޮޑަށް ޕްރަޔޯރިޓީ އެބަދެމޭ. އޭގެތެރޭގައި މާކެޓުގައި ހުހެއް ނުވޭ. އެހެންނަމަވެސް ހުސްވިޔަނުދީ އެކަން ކުރުމަށްޓަކައި އައިޓަމްސް ލިބޭނެގޮތް ހެދުމަށްޓަކައި އަޅުގަނޑުމެން މިކަން މިކުރަނީ” ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، މިހާރު އިސްކަންދީގެން ގެންނަން މަސައްކަތްކުރާ ބާވަތްތައް އަދި ރާއްޖޭގެ ބާޒާރުން ހުސްނުވާ ކަމަށެވެ. ނަމަވެސް، އިގްތިސާދީ ވުޒާރާގެ އަމާޒަކީ އެފަދަ މުދާ ހުސްވުމުގެ ކުރިން ރާއްޖެއަށް ލިބޭނެ އިންތިޒާމު ހަމަޖައްސައި، ރައްޔިތުންނަށް ދަތިނުވާނެ ގޮތަށް ކަންކަން ތަރުތީބު ކުރުން ކަމަށް ސައީދު ވިދާޅުވިއެވެ.
