އިހަވަންދިއްޕޮޅުގައި ސަރުކާރުން އަލަށް ފެށި ބަންކަރިން ޚިދުމަތުން ދައުލަތަށް މިހާތަނަށް 730 މިލިއަން ރުފިޔާ (ގާތްގަނޑަކަށް 47 މިލިއަން ޑޮލަރު) ލިބިފައިވާ ކަމަށް އިކޮނަމިކް މިނިސްޓަރު މުޙައްމަދު ސަޢީދު ހާމަކުރައްވައިފިއެވެ.
މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު ސަޢީދު ވިދާޅުވީ، ބަންކަރިންގެ ވިޔަފާރި ރާއްޖޭގައި ރަސްމީކޮށް ފެށިފަހުން މިދިޔަ މާރިޗު މަހުގެ 31 ވަނަ ދުވަހާ ހަމައަށް މި ބޮޑު އާމްދަނީ ލިބިފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށެވެ.
“މާރިޗު 31އާ ހަމައަށް 730 މިލިއަން ރުފިޔާ އިންޓަނޭޝަނަލް ބަންކަރިންގެ ވިޔަފާރި ފެށިފަހުން ލިބިފައި އޮތް ކަމަށް އަޅުގަނޑަށް މައުލޫމާތު ލިބެނީ،” ސައީދު ވިދާޅުވިއެވެ
މި ޚިދުމަތަކީ ދިވެހި ސަރުކާރުގެ ކުންފުނި އެސްޓީއޯ އާއި ދުނިޔޭގެ ހަކަތައިގެ ބޮޑު ކުންފުންޏެއް ކަމަށްވާ ނެދަލޭންޑްސްގެ “ވިޓޯލް” އާ ގުޅިގެން ފޯރުކޮށްދޭ ޚިދުމަތެކެވެ. މި ޚިދުމަތް ދިނުމަށްޓަކައި ދެ ކުންފުނީގެ ދެމެދުގައި އެއްބަސްވުމެއްގައި ސޮއިކޮށްފައިވަނީ 2024 ވަނަ އަހަރުގެ މާރިޗު މަހުގެ ތެރޭގައެވެ. ސަރުކާރުން އަންދާޒާކުރާ ގޮތުގައި މި މަޝްރޫޢުގެ ސަބަބުން އަހަރަކު ގާތްގަނޑަކަށް 400 މިލިއަން ޑޮލަރު ރާއްޖޭގެ އިގްތިސާދަށް ވަންނާނެއެވެ.
,,ރައީސްގެ ވައުދުފުޅެއް 33 އިންސައްތަ ކަރަންޓު އިއާދަކުރަވެނި ހަކަތައިން އުފެއްދުމަކީ. އެއީ 2028 އާއި ހަމައަށްދާންވާއިރަށް. އެހެންވީމަ އެކަމުގެ ތެރިން ސްޕެޝަލް އިކޮނަމިކް ޒޯންގެ ލައިސެންސް އެ އޮތީ ދީފައި ސަސްޓޭނިބަލް ޓައުންޝިޕަކަށާއި ފްލޯޓިން ސޯލާ ސަރަހައްދެއް ގާއިމްކުރުމަށް.” ސައީދު ވިދާޅުވިއެވެ.
ވަޒީރު ވިދާޅުވީ މި ސަރުކާރުން ފަސް އަހަރަށްވެފައިވާ ވައުދުތައް ފުއްދުމަށް އެކި ކަންކަން ކުރަމުންދާ ކަމަށެވެ. އަދި އެކި މަސައްކަތްތައް ސަރުކާރުގެ ތެރެއިން ހިނގަމުންދާ ކަމަށެވެ. އަދި ފަސް އަހަރުގެ ތެރޭގައި އެދެވޭ ނަތީޖާ ފެނިގެންދާނެ ކަމަށް ވިދާޅުވިއެވެ
ބަންކަރިންގެ ޚިދުމަތް ހަރުދަނާކުރުމުގެ ގޮތުން “އުތުރު އުލިގަމު އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް” ގެ ނަމުގައި އައު އިމާރާތެއް ވަނީ ބިނާކޮށްފައެވެ. އަދި މި ޚިދުމަތް ދިނުމުގައި އެސްޓީއޯ އިން މިހާރު ތިން ބޯޓެއް ބޭނުންކުރަމުންދެއެވެ. އޭގެ ތެރޭގައި އެސްޓީއޯގެ ސަބްސިޑަރީ ކުންފުނި، އެމްއެސްއެސް އިން އޮޕަރޭޓްކުރާ މަހަކު 200 ޓަނުގެ ތެޔޮ އުފުލޭ “ވައިސީ ބެރިއާ” އާއި، އަލަށް ގެނެވުނު 4،000 މެޓްރިކް ޓަނުގެ ތެޔޮ އުފުލޭ ބޯޓެއްގެ އިތުރުން 3،200 މެޓްރިކް ޓަނުގެ ތެޔޮ އުފުލޭ ބޯޓެއް ހިމެނެއެވެ.
ރާއްޖޭގެ އެންމެ އުތުރުގައި މި ޚިދުމަތް ފެށުމުގެ ކުރިން، މި ސަރަހައްދުން ދަތުރުކުރާ ބޯޓުފަހަރު ބަންކަރިންގެ ޚިދުމަތް ހޯދަމުން އައީ އަވަށްޓެރި ސްރީލަންކާގެ ކޮލޮމްބޯ ބަނދަރާއި އިންޑިއާގެ ބަނދަރުތަކުންނެވެ. ނަމަވެސް، ރައީސް ޑރ. މުޙައްމަދު މުޢިއްޒުގެ ސަރުކާރުން ފެށި މި މަޝްރޫޢާއެކު، ރާއްޖޭގެ އިގްތިސާދަށް އައު ދޮރުތަކެއް ހުޅުވި، ބޭރު ފައިސާ ވަންނަ މިންވަރު އިތުރުވެގެންދާނެއެވެ.
