ބ. ހިތާދޫއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ކުރިއަށްގެންދާ ބިން ހިއްކުމުގެ މަޝްރޫޢުގެ އަމަލީ މަސައްކަތް ފެށުމަށް އެމްޓީސީސީން ތައްޔާރުވެއްޖެއެވެ.
މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރުގެ އޮގަސްޓް މަހު އެ ރަށަށް ކުރެއްވި ދަތުރުފުޅުގައި، ރަށުގެ ރައްޔިތުންނާއި ކައުންސިލުން އެދިފައިވާ އެންމެ ބޮޑު އެދުމަށް އިޖާބަދެއްވުމުގެ ގޮތުން ފެއްޓެވި މަސައްކަތެކެވެ. ރަށުގެ ބިމުގެ ޖާގަ އެއްކޮށް ފުރިފައިވުމުގެ ސަބަބުން، ގިނަ އަހަރުތަކެއް ވަންދެން ބަންދުވެފައި އޮތް ބޯހިޔާވަހިކަމުގެ ފުރުޞަތުތައް މި މަޝްރޫޢާއެކު އަލުން ހުޅުވިގެންދާނެއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނީ، މި މަސައްކަތަށް ބޭނުންވާ ސާމާނާއި މެޝިނަރީޒް މިދިޔަ މަހުގެ 27 ވަނަ ދުވަހު ހިތާދޫއަށް ގެންގޮސްފައިވާ ކަމަށެވެ. އަދި މިހާރު ކުރިއަށްދަނީ ބިން ހިއްކުމަށް ހަމަޖެހިފައިވާ ސަރަޙައްދު ވަކިކުރުމުގެ ގޮތުން ފަޅުތެރޭގައި “ބައުންޑް ވޯލް” ޖެހުމުގެ މަސައްކަތް ކަމަށް އެ ކުންފުނިން މަޢުލޫމާތު ދެއެވެ.
ޖުމްލަ 137 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫޢުގެ ދަށުން ހިތާދޫއިން 15 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މީގެ އިތުރުން ހިއްކާ ބިމުގެ ހިމާޔަތަށްޓަކައި 691 މީޓަރުގެ ރިވެޓްމަންޓް ޖެހުމާއި، 25 މީޓަރުގެ ހަ ފައިކަށި ލުމުގެ މަސައްކަތްވެސް ހިމެނެއެވެ. އެމްޓީސީސީއާ މި މަސައްކަތް ހަވާލުކޮށްފައިވަނީ އެއް އަހަރާއި ތިން މަސް ދުވަހުގެ ތެރޭގައި ނިންމާ ގޮތަށެވެ.
ގާތްގަނޑަކަށް 1400 މީހުންގެ އާބާދީއެއް އޮންނަ ހިތާދޫގެ ބިން ހިއްކުމުގެ މަޝްރޫޢު ނިމުމުން، ބޯހިޔާވަހިކަމުގެ އިތުރުން ރަށުގެ އިޤްތިޞާދީ ކުރިއެރުމަށް ބޭނުންވާ އެކި ފުރުޞަތުތައް ފަހިވެ، ރަށުގެ ތަރައްޤީއަށް އާ ދިރުމެއް ލިބިގެންދާނެ ކަމަށް ސަރުކާރުން ބުންޏެވެ.
