މާލޭގެ އުތުރު ފަރާތު ބޮޑުތަކުރުފާނުމަގު ޒަމާނީ ފެންވަރަށް ތަރައްގީކުރުމުގެ ބޮޑު މަޝްރޫއުގެ ދަށުން، އެ ސަރަހައްދުގެ ޓްރެފިކް ފްލޯއަށް ބޮޑެތި ބަދަލުތަކެއް ގެނައުމަށް ދިވެހި ފުލުހުންގެ ހިދުމަތުން ނިންމައިފިއެވެ.
މި މަޝްރޫއުގެ ދަށުން ސެގްމެންޓް 2 އިން ފެށިގެން 5 އާ ހަމައަށްވާ ސަރަހައްދުގެ އަމަލީ މަސައްކަތް ފެށުމަށް ހަމަޖެހިފައިވަނީ މާދަމާއެވެ. މި މަސައްކަތަށް މަގު ތައްޔާރުކުރުމުގެ ގޮތުން، މިރޭ މެންދަމު 00:00 އިން ފެށިގެން އެ ސަރަހައްދުގެ ޓްރެފިކް ފްލޯއަށް ބަދަލުތައް ގެނެސް، އާންމު ދަތުރުފަތުރަށް ބައެއް މަގުތައް ބަންދުކުރެވޭނެއެވެ.
ފުލުހުން ވިދާޅުވި ގޮތުގައި، ބާސެލޯ ނަސަންދުރަ އިން ފެށިގެން ބޮޑުތަކުރުފާނުމަގާއި ޗާންދަނީމަގު ގުޅޭ ކަންމައްޗާ ހަމައަށް އޮންނަ ސަރަހައްދު އާންމު ޓްރެފިކަށް މުޅިން ބަންދުވާނެއެވެ. އެހެންކަމުން، އެ ސަރަހައްދުގައި ޕާކުކޮށްފައިވާ އުޅަނދުތައް ކަނޑައެޅިފައިވާ ވަގުތުގެ ކުރިން ނެންގެވުމަށް ފުލުހުން ވަނީ އިލްތިމާސްކުރައްވާފައެވެ.
މި މަޝްރޫއާ ގުޅޭގޮތުން މާލެ ސިޓީ ކައުންސިލުން ވިދާޅުވެފައިވަނީ، މަގު ހެދުމުގެ މަސައްކަތް ކުރިއަށްދާއިރު ފަޅުތެރޭގެ ބައެއް ސަރަހައްދުތައް ވެސް ބޭނުންކުރުން ބަންދުވާނެ ކަމަށެވެ. އެގޮތުން:
- ހެންވޭރު ފެރީ ޓާމިނަލުން ފެށިގެން މަސްވެރިންގެ ޕާކާ ހަމައަށް އޮންނަ ފަޅުގެ ސަރަހައްދު މިއަދުން ފެށިގެން މަސައްކަތް ނިމެންދެން ބަންދުވާނެއެވެ.
- މަސްވެރިންގެ ޕާކުން ފެށިގެން 5 ނަންބަރު ފާލަމާ ހަމައަށް އޮންނަ ސަރަހައްދު މި މަހުގެ 30 ވަނަ ދުވަހުން ފެށިގެން ބަންދުކުރެވޭނެއެވެ.
- ފަސް ނަންބަރު ފާލަމުން ފެށިގެން އިއްޒުއްދީން ފާލަމާ ހަމައަށް އޮންނަ ސަރަހައްދު އަންނަ މަހުގެ 17 އިން ފެށިގެން ބަންދުކުރުމަށް ވަނީ ނިންމާފައެވެ.
ފުލުހުންގެ އިދާރާއިން ވަނީ މި ބަދަލުތަކުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށްޓަކައި މައާފަށް އެދިވަޑައިގެންފައެވެ. އަދި މިފަދަ ގައުމީ ތަރައްގީގެ މަސައްކަތްތަކުގައި ރައްޔިތުންގެ ފަރާތުން ލިބޭ އެއްބާރުލުމަށް ޝުކުރު އަދާކުރައްވާފައިވެއެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މާލޭގެ މަގުތައް ޒަމާނީ ފެންވަރަށް ތަރައްގީކުރުމަށް ކުރިއަށްގެންދާ މުހިންމު މަސައްކަތެކެވެ.
