ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދުމަށް ސަރުކާރުން ފަށާފައިވާ ހާއްސަ މަސައްކަތުގެ ތެރެއިން، ހުޅުމާލޭގައި ހިންގި އޮޕަރޭޝަނެއްގައި 59 ބިދޭސީއަކު ބަލައި ފާސްކޮށް އޭގެ ތެރެއިން ތިން މީހަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން މައުލޫމާތު ދެއްވި ގޮތުގައި، އިއްޔެ ހެނދުނާއި ހަވީރު ހުޅުމާލޭގެ އެކި ސަރަހައްދުތަކުގައި ކުރިއަށް ގެންދިޔަ މި އޮޕަރޭޝަނަކީ ގަވާއިދާ ހިލާފަށް އުޅޭ ބިދޭސީން ދެނެގަތުމަށް ކުރަމުންދާ ސިލްސިލާ މަސައްކަތްތަކުގެ ބައެކެވެ. މި އޮޕަރޭޝަންގެ ތެރެއިން ޖުމްލަ 59 ބިދޭސީއަކާ ސުވާލުކޮށް، އެމީހުންގެ ލިޔެކިޔުންތައް ޗެކްކޮށްފައިވާއިރު، ބަލައި ފާސްކުރި މީހުންގެ ތެރެއިން އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ރާއްޖޭގައި ތިބުމުގެ ގާނޫނީ ލިޔެކިޔުން ފުރިހަމަނުވާ ތިން ބިދޭސީއެކެވެ.
Monitoring activity under the Migration Monitoring & Compliance Program (MMCP) was conducted yesterday morning and evening across Malé and Hulhumalé. During the operation, 59 expats were checked and 3 expats working illegally were detained.#MMCP #MaldivesImmigration pic.twitter.com/qDzbew4xEI
— Maldives Immigration (@ImmigrationMV) March 13, 2026
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބިދޭސީންގެ މައްސަލަ ހައްލުކުރުމަށް ދެއްވާ ހާއްސަ އިސްކަމުގެ ދަށުން، މިދިޔަ އަހަރުގެ ނޮވެމްބަރު މަހުން ފެށިގެން އިމިގްރޭޝަނުން އަންނަނީ މާލެ ސަރަހައްދުގައާއި އަތޮޅުތެރޭގައި ފުޅާ ދާއިރާއެއްގައި ރެއިޑް އޮޕަރޭޝަންތައް ހިންގަމުންނެވެ. މި އޮޕަރޭޝަންތަކުގައި މިހާތަނަށް ގިނަ އަދަދެއްގެ ބިދޭސީން ވަނީ އަތުލައިގަނެފައެވެ.
އިމިގްރޭޝަނުން ވިދާޅުވީ، ގަވާއިދާ ހިލާފަށް އުޅޭ ބިދޭސީން ހޯދުމަށް ހިންގާ މި ހަރަކާތްތަކުގައި އަތުލައިގަންނަ މީހުން ޑިޕޯޓޭޝަން ސެންޓަރުގައި ބަންދުކޮށް، އެމީހުން އަނބުރާ ގައުމަށް ފޮނުވާލުމުގެ އިދާރީ މަސައްކަތްތައް ވެސް ހުއްޓުމެއް ނެތި ކުރިއަށްދާ ކަމަށެވެ.
މި އޮޕަރޭޝަންތަކުގެ މައިގަނޑު އަމާޒަކީ ރާއްޖޭގައި އެތައް އަހަރުތަކެއް ވަންދެން ގަވާއިދާ ހިލާފަށް އުޅެމުންދާ ބިދޭސީންނާއި، ގަވާއިދާ ހިލާފަށް ކުދި ވިޔަފާރިތައް ކުރަމުންދާ ބިދޭސީން ހޯދައި، ގާނޫނީ ފިޔަވަޅު އެޅުމެވެ. ސަރުކާރުގެ އަމާޒަކީ ކުރިއަށް އޮތް އަހަރުތަކުގެ ތެރޭގައި ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމެވެ.
