މާލޭގެ އުތުރު ފަރާތުގައި ހުންނަ މަސްޖިދުއްސުލްތާން މުހައްމަދު ޝަމްސުއްދީން ނުވަތަ މަޝްހޫރު ނަމުން ނަމަ ބަންޑާރަ މިސްކިތް ހުރި ތަނުގައި އާ މިސްކިތެއް ބިނާކުރުމާ މެދު އާންމުންގެ މެދުގައި ބޮޑެތި ބަހުސްތަކެއް އުފެދިފައި ވަނިކޮށް، އެކަމުގައި ފުޅާ ދާއިރާއެއްގައި މަޝްވަރާކުރައްވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މި މައްސަލަ ފެންމަތިވީ، ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް ދީލަތި ފަރާތަކުން އެހީތެރިކަން ހަމަޖައްސައިދީފައިވާ ކަމަށާއި، ރޯދަ މަހަށް ފަހު އެ މަސައްކަތް ފަށާނެ ކަމަށް މިނިސްޓަރު އިއުލާނު ކުރެއްވުމާ ގުޅިގެންނެވެ. މި ނިންމުމާއެކު ސޯޝަލް މީޑިއާގައި ގިނަ ބަޔަކު ވަނީ އެއީ 100 އަހަރަށް ވުރެ ގިނަ ދުވަސްވީ އާސާރީ ބިނާއެއް ކަމަށް ބުނެ، އެތަން ތަޅާލުމާ ދެކޮޅަށް “ސޭވް ބަންޑާރަ މިސްކިތް” ގެ ނަމުގައި ކެމްޕެއިނެއް ފަށައިފަ އެވެ.
އެ ފާޑުކިޔުންތަކާ ގުޅިގެން މިނިސްޓަރު ޝަހީމް އެންމެ ފުރަތަމަ ވަނީ އެ ނިންމުން ދިފާއުކުރައްވައި ވާހަކަ ދައްކަވާފަ އެވެ. މިނިސްޓަރު ވިދާޅުވި ގޮތުގައި، ތަނަކަށް 100 އަހަރުވުމަކީ އެތަނެއް ހުރި ގޮތަށް ބަހައްޓަންޖެހޭ ސަބަބެއް ނޫނެވެ. އަދި ބަންޑާރަ މިސްކިތަކީ ރާއްޖޭގެ އާސާރީ މިސްކިތްތަކުގެ ރަސްމީ ލިސްޓުގައި ހިމެނޭ ތަނެއް ނޫން ކަމަށް ވެސް ވަޒީރު ފާހަގަކުރެއްވި އެވެ.
ޝަހީމް އިތުރަށް ވިދާޅުވީ، ރާއްޖެއަށް ވިޔަފާރިކުރަން އައި އިންޑިއާގެ ވޯރާ ވިޔަފާރިވެރިން ބިނާކުރި އެ މިސްކިތަކީ ތާރީޚީ ތަނަކަށް ވާންޖެހޭ އެއްވެސް ސަބަބެއް ނެތް ކަމަށެވެ. އަދި އެ މިސްކިތް މިހާރު ހުރީ ވެސް ކުރީގެ ރައީސް އިބްރާހީމް ނާސިރާއި ރައީސް މައުމޫން އަބްދުލްގައްޔޫމްގެ ވެރިކަމުގައި ގެނައި ބޮޑެތި ބަދަލުތަކާއެކު، އަސްލު ބުމްބާ ވިޔަފާރިވެރިން އެޅި ގޮތަށް ނޫން ކަމަށް ވެސް ވިދާޅުވި އެވެ.
ނަމަވެސް، އާންމުންގެ ކަންބޮޑުވުންތައް އިތުރުވެ، މިސްކިތް ހިމާޔަތްކުރުމަށް ގޮވާލާ އަޑުތައް ގަދަވުމާ ގުޅިގެން، ރޭގެ ވަގުތެއްގައި މިނިސްޓަރު ވަނީ އެކްސްގައި ކުރެއްވި ޕޯސްޓެއްގައި އާ ފިޔަވަޅެއް އަޅުއްވާފަ އެވެ. އެގޮތުން، އިސްލާމިކް މިނިސްޓްރީން ކަންކަން ކުރާނީ ރައްޔިތުންގެ އަޑުއަހައިގެން ކަމަށާއި، އެތަނުގައި އާ މިސްކިތެއް ބިނާކުރުމާ މެދު ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށް މިނިސްޓަރު ވިދާޅުވި އެވެ.
“ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމެނާފަ އޮންނަ މިސްކިތެއްނޫންވީމާ އެތަނުގައި ބޮޑު މިސްކިތެއް ބިނާކުރަން ޤަސްތުކުރީ. މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުން.” ޝަހީމް ވިދާޅުވި އެވެ.
މާލޭގެ އެންމެ ކާރުބާރު ބޮޑު ސަރަހައްދުގައި ހުންނަ މި މިސްކިތަކީ ގިނަ ބައެއްގެ ހަނދާންތަކާ ގުޅިފައިވާ ބިނާއަކަށް ވާއިރު، ތާރީޚަށް ލޯބިކުރާ ފަރާތްތަކުން ދަނީ އެތަން ތަޅާނުލައި، މިހާރު ހުރި ގޮތަށް މަރާމާތުކޮށް ހިމާޔަތްކުރުމަށް ބާރުއަޅަމުންނެވެ. މިނިސްޓަރުގެ ފަހުގެ ނިންމެވުމާއެކު، މިސްކިތުގެ މުސްތަގުބަލާ މެދު ގޮތެއް ނިންމާނީ އާންމުންގެ ޚިޔާލާއި މަޝްވަރާގެ މަތިންކަން މިހާރު ވަނީ ކަށަވަރުވެފަ އެވެ.
