ބ. އަތޮޅުގެ ވެރިކަން ކުރާ ރަށް، ބ. އޭދަފުށީގައި މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) ގެ އައު ކެމްޕަހެއް އިމާރާތްކުރުމުގެ އަމަލީ މަސައްކަތް ފެށުމުގެ ގޮތުން ބިންގާ އެޅުމުގެ ރަސްމިއްޔާތު ބާއްވައިފިއެވެ.
މި މަޝްރޫއުގެ ބިންގާ އަޅުއްވައިދެއްވީ ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދެވެ. އޭދަފުށީގައި ބޭއްވި މި ހާއްސަ ރަސްމިއްޔާތުގައި އެ ރަށު ދާއިރާގެ ރައްޔިތުންގެ މަޖިލިސް މެންބަރު އަހުމަދު ސަލީމާއި، އެމްޓީސީސީގެ މެނޭޖިން ޑިރެކްޓަރު، އަހުމަދު ސައުދީގެ އިތުރުން އެމްއެންޔޫގެ ވައިސް ޗާންސެލަރ ޑރ. އައިޝަތު ޝެހެނާޒް ބައިވެރިވެވަޑައިގެންނެވި އެވެ. މީގެ އިތުރުން އޭދަފުށީ ކައުންސިލް ރައީސް މުޙައްމަދު ފާތިހާއި ކައުންސިލް މެންބަރުންނާއި ރަށުގެ އެކި މުއައްސަސާތަކުގެ އިސްވެރިން ވެސް މި ރަސްމިއްޔާތުގައި ބައިވެރިވެވަޑައިގެންނެވި އެވެ.
މި މަޝްރޫއަކީ ޖުމްލަ 80.79 މިލިއަން ރުފިޔާއަށް 720 ދުވަސްތެރޭ ނިންމުމަށް އެމްޓީސީސީއާ ހަވާލުކޮށްފައިވާ މަޝްރޫއެކެވެ. މި މަޝްރޫއުގެ ދަށުން އެކަޑެމިކް، އިދާރީ، އަދި ރެސިޑެންޝަލް ފެސިލިޓީތައް ހިމެނޭ ގޮތަށް މަލްޓި ބްލޮކް ޔުނިވަރސިޓީ ކެމްޕަހެއް ފުރިހަމައަށް ޑިޒައިންކޮށް އިމާރާތްކުރުމަށް ވަނީ ހަމަޖެހިފަ އެވެ.
ގާތްގަނޑަކަށް 3,500 މީހުންގެ އާބާދީއެއް އޮންނަ އޭދަފުއްޓަކީ އަތޮޅުގެ ގިނަ ޒުވާނުން ސަރުކާރުގެ މުއައްސަސާތަކާއި ކައިރި ރިސޯޓްތަކުގައި ވަޒީފާ އަދާކުރާ ރަށެކެވެ. އެމްއެންޔޫގެ ކެމްޕަހެއް މި ރަށުގައި ޤާއިމުވެގެން ދިއުމާއެކު، ބ. އަތޮޅުގެ ދަރިވަރުންނަށް އަމިއްލަ އަތޮޅުގައި ތިބެގެން މަތީ ތަޢުލީމު އުނގެނުމުގެ ރަން ފުރުޞަތެއް ފަހިވެގެންދާނެއެވެ. މީގެ ސަބަބުން ތަޢުލީމަށް ކުރަންޖެހޭ ޚަރަދުތައް ކުޑަވެ، މުޅި އަތޮޅުގެ ތަޢުލީމީ ދާއިރާއަށް ބޮޑެތި ކުރިއެރުންތަކެއް ލިބިގެންދާނެ ކަމަށް އެމްޓީސީސީއިން ދެކެއެވެ.
1980 ވަނަ އަހަރު އުފެދުނު އެމްޓީސީސީއަކީ ވޭތުވެދިޔަ 44 އަހަރު ދުވަހުގެ ތެރޭގައި ރާއްޖޭގެ އުމްރާނީ ތަރައްޤީގެ މުހިންމު ބައިވެރިއެކެވެ. އެ ކުންފުނިން އަންނަނީ ރާއްޖޭގެ އެކި ކަންކޮޅުތަކުގައި އިޖުތިމާޢީ އަދި އިޤްތިޞާދީ ގޮތުން މުހިންމު ގިނަ މަޝްރޫޢުތަކެއް ކާމިޔާބުކަމާއެކު ހިންގަމުންނެވެ.
