ވޭތުވެދިޔަ ދޮޅުމަހެއްހާ ދުވަހުގެ ތެރޭގައި ރާއްޖެއަށް އެތެރެކުރަން އުޅުނު 83 ކިލޯއަށްވުރެ ގިނަ މަސްތުވާތަކެއްޗާއި، ގަވާއިދާ ހިލާފަށް އެތެރެކުރި ދެ މިލިއަން ސިނގިރޭޓް އަތުލައިގެންފައިވާކަން ސަރުކާރުން ހާމަކޮށްފިއެވެ.
މިކަމާ ގުޅޭ ތަފުސީލުތައް ހިއްސާކުރެއްވީ މިއަދު ހެނދުނު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހްސާން އެވެ. މިނިސްޓަރު ވިދާޅުވީ، މަސްތުވާތަކެތީގެ ސަޕްލައި މަދުކުރުމަކީ މި ސަރުކާރުން އެންމެ ބޮޑު އިސްކަމެއް ދީގެން ކުރަމުންދާ އެއް މަސައްކަތް ކަމަށެވެ.
ކަސްޓަމްސްއާއި ފުލުހުން ގުޅިގެން ހިންގި ތަފާތު އޮޕަރޭޝަންތަކުގައި ޖުމްލަ 83,450 ގްރާމްގެ މަސްތުވާތަކެތި އަތުލައިގަނެވިފައިވާ ކަމަށް މިނިސްޓަރު ވިދާޅުވިއެވެ. މިއީ މަގުމަތީގެ އަގަށް ބަލާއިރު ގާތްގަނޑަކަށް 72.2 މިލިއަން ރުފިޔާގެ ތަކެއްޗެވެ. މީގެ ތެރެއިން 72 ކިލޯގެ މަސްތުވާތަކެއްޗަކީ ކަސްޓަމްސްއިން ކަނޑާއި ވައިގެ މަގުން އަތުލައިގެންފައިވާ ތަކެތި ކަމަށްވެސް މިނިސްޓަރު ފާހަގަކުރެއްވިއެވެ.
“ފާއިތުވި ދޮޅުމަހެއްހާ ދުވަސް ތެރޭގައި ދިވެހި ރާއްޖޭގެ ކަސްޓަމްސްއާ ގުޅިގެން ހިންގުނު ތަފާތު އޮޕަރޭޝަންގެ ނަތީޖާއެއްގެ ގޮތުން 83450 ގްރާމްގެ މަސްތުވާތަކެތި ވަނީ އަތުލައިގެންފައި، މިއީ މަގުމަތީގެ އަގުންނަމަ 72.2 މިލިއަންގެ މަސްތުވާތަކެތި،” އިހުސާން ވިދާޅުވިއެވެ.
މަސްތުވާތަކެތީގެ އިތުރުން، ރާއްޖެއަށް އެތެރެކުރުން މަނާ ތަކެތި ހޯދުމަށް ކުރެވުނު މަސައްކަތުން، ވޭތުވެދިޔަ ދޮޅުމަސް ތެރޭގައި 7,000 ވޭޕް ސްޓިކާއި ގާތްގަނޑަކަށް ދެ މިލިއަން ސިނގިރޭޓް ވަނީ އަތުލައިގަނެފައެވެ.
މިނިސްޓަރު އިހްސާން ވިދާޅުވި ގޮތުގައި، މި ކާމިޔާބީއަކީ ކަސްޓަމްސްގެ ބޯޑާ ސެކިއުރިޓީ ވަރުގަދަކޮށް، ޒަމާނީ ހުނަރުތަކާއި އިންޓެލިޖެންސް މައުލޫމާތުގެ ބޭނުން އެންމެ ފުރިހަމައަށް ހިފުމުގެ ނަތީޖާއެވެ. އަދި މިއީ ފުލުހުންނާއި ކަސްޓަމްސްގެ މުވައްޒަފުން ގުޅިގެން ކުރި ވަރަށް ބުރަ މަސައްކަތެއްކަންވެސް އޭނާ ފާހަގަކުރެއްވިއެވެ.
ރައީސް ޑރ. މުހައްމަދު މުއިއްޒުގެ ސަރުކާރުން އަންނަނީ ރާއްޖެއަށް މަސްތުވާތަކެތި އެތެރެވުން ހުއްޓުވުމަށާއި، ބޯޑަރު ސެކިއުރިޓީ ހަރުދަނާކުރުމަށް ގިނަ ފިޔަވަޅުތަކެއް އަޅަމުންނެވެ.
