ފާއިތުވި ދެ އަހަރެއްހާ ދުވަހުގެ ތެރޭގައި ރާއްޖޭގެ ޖަލުތަކަށް 400 ގައިދީންގެ ޖާގަ އިތުރުކޮށް، ޖާގަ ނެތުމުގެ ސަބަބުން މުޖުތަމަޢަށް ދޫވެފައި ތިބި ކުށްވެރިން އަނބުރާ ޖަލަށް ގެނައުމުގެ ބޮޑު މަޝްރޫޢެއް ފަށާފައިވާ ކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން އިޢުލާން ކުރައްވައިފިއެވެ.
ވުޒާރާގެ މަސައްކަތްތަކާ ގުޅޭގޮތުން މައުލޫމާތު ދެއްވަމުން ވަޒީރު ވިދާޅުވީ، ކުރީ ސަރުކާރުން މާލޭ ޖަލާއި ކަސްޓޯޑިއަލް ފެސިލިޓީ އުވާލުމުގެ ސަބަބުން 450 މީހުންގެ ޖާގަ ގެއްލި، ގިނަ އަދަދެއްގެ ގައިދީން ދޫވި ކަމަށެވެ. މާލޭ ޖަލަކީ އެންމެ ފެންވަރު ރަނގަޅު ވަސީލަތްތައް ހުރި ތަން ނަމަވެސް، އެތަނާ އިންވެގެން ސްކޫލެއް އެޅުމަށްފަހު ޖަލު ބަންދުކުރުމަކީ ކުރިމަތިވި ގޮންޖެހުމެއްކަން ވަޒީރު ފާހަގަކުރެއްވިއެވެ.
ހުޅުމާލޭގައި ޖާގަ އިތުރުކުރުމަށް ކުރެވުނު މަސައްކަތްތަކަށް އަލިއަޅުއްވާލައްވަމުން އިޙުސާން ވިދާޅުވީ، ކުރީ ސަރުކާރުން 39 މިލިޔަން ރުފިޔާ ހޭދަކޮށްގެންވެސް ނުނިމި އޮތް 100 މީހުންގެ ޖާގަ، މި ސަރުކާރުން އެންމެ 5 މިލިޔަން ރުފިޔާގެ ބަޖެޓަކުން ފަސް މަސްދުވަހުގެ ތެރޭގައި ނިންމާފައިވާ ކަމަށެވެ. މި މަސައްކަތް ނިންމާފައިވަނީ ކަރެކްޝަންސްގެ މުވައްޒަފުންގެ އެހީތެރިކަމާއެކުގައެވެ.
ޖަލުތަކުގެ ސަލާމަތީ ކަންކަމަށް ގެނެވުނު އިންގިލާބީ ބަދަލެއްގެ ގޮތުން، މާފުށީ ޖަލުގައި މިހާރު ވަނީ ބޮޑީ ސްކޭނަރު ބަހައްޓާފައެވެ. ވަޒީރު ވިދާޅުވި ގޮތުގައި، މީގެ ފަހުން ގައިދީންނާއި، އާއިލާތަކާއި، އަދި ޖަލު އޮފިސަރުންވެސް ޖަލަށް ވަދެވޭނީ ސްކޭން ކުރުމަށްފަހުގައެވެ. މިއީ ޖަލަށް ފޯނު ވެއްދުމާއި، ސްކޭމް ކޯލްތައް ކުރާ މައްސަލައަށް ދާއިމީ ހައްލެއް ހޯދުމަށް އެޅުނު މުހިންމު ފިޔަވަޅެކެވެ.
ހިދުމަތްތައް އަވަސްކުރުމުގެ ގޮތުން ޖަލާ ގުޅުންހުރި ކަންކަމަށް އޮންލައިން ޕޯޓަލްއެއް ތަޢާރަފުކޮށް، އާއިލާތަކުން އިދާރާތަކަށް ހާޒިރުވާންޖެހޭ ޖެހުން މިހާރު ވަނީ ނިމުމަކަށް ގެނެސްފައެވެ.
މީގެ އިތުރުން، އަތޮޅުތަކުގެ އަމާންކަން ދެމެހެއްޓުމަށްޓަކައި ފުލުހުންގެ 53 އިމާރާތެއްގެ މަސައްކަތް ކުރިއަށްދާކަން ވަޒީރު ހާމަކުރެއްވިއެވެ. މީގެ ތެރެއިން މިހާރުވެސް ދެ އިމާރާތެއް ނިންމާ ޚިދުމަތް ދޭން ފަށާފައިވާއިރު، މި މަހުގެ ނިޔަލަށް އިތުރު 11 ތަނެއްގެ މަސައްކަތް ނިންމާލެވޭނެ ކަމަށް ވަޒީރު ޢަލީ އިޙުސާން ވިދާޅުވިއެވެ.
