ހަނގުރާމަވެރި އެކި ސަރަހައްދުތަކުގައި ތާށިވެފައި ތިބި 60 އެއްހާ ދިވެހިން އަނބުރާ ގައުމަށް ގެނައުމުގެ މަސައްކަތް ސަރުކާރުން ބާރަށް ކުރިއަށް ގެންދާކަން ދާހިލީ ސަލާމަތާއި ފަންނިއްޔަތާ ބެހޭ ވަޒީރު އަލީ އިހުސާން ހާމަކުރައްވައިފި އެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު އިހުސާން ވިދާޅުވީ، ހަނގުރާމަވެރި ސަރަހައްދުތަކުގައި ތާށިވެފައި ތިބި ދިވެހި އާއިލާތަކުގެ ހާލަތު ނިމުމަކަށް ގެނެސް، އެ މީހުން ވީހާވެސް އަވަހަކަށް ރާއްޖެ ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އަންގަވާފައި ކަމަށެވެ.
ވަޒީރު ވިދާޅުވި ގޮތުގައި މިހާރު އެންމެ ބޮޑު އިސްކަމެއް ދީގެން ކުރިއަށްދަނީ ސީރިއާގެ ދެ ސަރަހައްދެއްގައި ތިބި ކަމަށް ބެލެވޭ 60 އެއްހާ މީހުން ގެނައުމުގެ މަސައްކަތެވެ. މީގެ ކުރިންވެސް މިފަދަ ހާލަތްތަކުގައި ތިބި 23 މީހަކު ގެނެސް، މުޖުތަމައުއަށް އަހުލުވެރިކުރުވުމުގެ ޕްރޮގްރާމްތަކަށްފަހު ވަނީ ރީ-އިންޓަގްރޭޓް ކުރެވިފައެވެ.
މި މަސައްކަތުގެ ތެރެއިން ދާދިފަހުން ދެ ދިވެއްސަކު ރާއްޖެ ގެނެސްފައިވާކަން ވަޒީރު ފާހަގަކުރެއްވިއެވެ. އެއީ ތުރުކީ މަގުން ހަނގުރާމައަށް ދާން އުޅެނިކޮށް އެ ގައުމުގެ ސަރުކާރުން ހައްޔަރުކުރި ތިން ދިވެހިންގެ ތެރެއިން ދެ މީހެކެވެ. ރާއްޖެ ގެނައި މި ދެ މީހުންނަކީ 14 އަހަރުގެ އަންހެން ކުއްޖަކާއި އޭނާގެ މަންމައެވެ.
“މި ދެމައިން މިހާރު ތިބީ ނެޝަނަލް ރީ-އިންޓަގްރޭޝަން ފެސިލިޓީގައި. އެ މީހުންނަށް ދޭންޖެހޭ ހުރިހާ ހިދުމަތްތަކާއި، އަލުން މުޖުތަމައުއަށް ނެރުމަށް ބޭނުންވާ ތަމްރީންތަކާއި ޕްރޮގްރާމްތައް އެތަނުގައި ކުރިއަށްދާނެ،” ވަޒީރު އިހުސާން ވިދާޅުވިއެވެ.
ވަޒީރު އިތުރަށް ވިދާޅުވީ، ހަނގުރާމައިގައި ބައިވެރިވުމަށް އާއިލާތައް ގޮވައިގެން ދިޔަ ފަރާތްތަކުގެ ސަބަބުން ހާލުގައި ޖެހިފައިވާ އަންހެނުންނާއި ކުޑަކުދިންނަށް ހާއްސަ ސަމާލުކަމެއް ދީގެން، އެ މީހުން ރާއްޖެ ގެނެސް ދިވެހި މުޖުތަމައުގެ ބައެއްގެ ގޮތުގައި އަލުން ބިނާކުރުމަކީ ސަރުކާރުގެ އަމާޒެއް ކަމަށެވެ.
