މެދުއިރުމަތީގައި މިހާރު ކުރިޔަށްދާ ހަނގުރާމައާ ގުޅިގެން މިއަދު އެކަނިވެސް 18 ފްލައިޓު ކެންސަލްކޮށްފި ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އަމީން ވަނީ ދެ ދާއިރާއަކުން އެ މިނިސްޓްރީގެ އަދާހަމަ ހާމަކޮށްފައެވެ. އަމީން ވިދާޅުވީ މެދުއިރުމައްޗަކީ ރާއްޖެއަށް އެންމެ ގިނަ އެއާ ކަނެކްޓިވިޓީ އޮތް އަދި އެންމެ ގިނަ ފަތުރުވެރިން، ހަބެއްގެ ގޮތުގައި މެދުއިރުމަތިން ރާއްޖެ އަންނަ ކަމަށާއި ހަނގުރާމައާ ގުޅިގެން ދަތުރުފަތުރުގެ ނިޒާމަށް އަސަރުކުރަމުންދާ ކަމަށެވެ. އެގޮތުން މިއަދު އެކަނިވެސް18 ފްލައިޓް ކެންސަލްވެއްޖެ ކަމަށް އަމީން ވިދާޅުވިއެވެ.
“މިއަދުގެ ހާލަތަށް ބަލާކަމުގައިވާނަމަ މިއަދު ރާއްޖެއަށް 53 ޝެޑިއުލް ފްލައިޓް އަންނަން އޮތްއިރު، އޭގެތެރެއިން 18 ފްލައިޓް މިހާރު ކެންސަލްވެއްޖެ.” އަމީން ވިދާޅުވިއެވެ.
ވަޒީރު ވިދާޅުވި ގޮތުގައި މިދިޔަ މަހު28 ވަނަ ދުވަހުން ފެށިގެން މެދުއިރުމަތިން އަންނަ ފްލައިޓްތައް ކެންސަލްވެ ދަތުރުފަތުރަށް ވަނީ ބުރޫއަރާފައެވެ. އަދި ހަމައެއާއެކު އެ ފްލައިޓްތައް ކެންސަލްވުމުގެ ސަބަބުން ފަތުރުވެރިން ނުފުރި ރާއްޖޭގައި ތާށިވުމާއި މިހާރުވެސް ގާތްގަނޑަކަށް 379 ފަތުރުވެރިން ނުފުރިފައި އެބަތިބިކަމަށް ވަޒީރު ވަނީ ވިދާޅުވެފައެވެ. އޭގެތެރެއިން 110 ފަތުރުވެރިން ތިއްބެވީ ސަރުކާރުން އެމީހުންގެ ސަލާމަތާއި ރައްކާތެރިކަމަށްޓަކައި އެއާޕޯޓުގައި ތިބެވޭނެ އިންތިޒާމު ހަމަޖައްސާފައިވާކަން ވަނީ ހާމަކޮށްފައެވެ.
“މިއަދުގެ ހާލަތަށް ބަލާއިރު އެބަހުރި ކޮންމެވެސް ވަރަކަށް ކޮމާޝަލް އެކްޓިވިޓީސް ނުނީ ކޮމާޝަލް ފްލައިޓްސް އޮޕަރޭޓް ކުރަން ފަށައިފި. ރޭގަވެސް އެމިރޭޓްސްގެ ފްލައިޓެއް ރާއްޖެ އައި ރެސްކިއު ކުރުމަށްޓަކައި. ވަރަށް ކުޑަކުޑަ ދާއިރާގައި ކުޑަދޮރެއް ހުޅުވައިގެން އެއާސްޕޭސްގައި އެބޭފުޅުން އޮޕަރޭޓްކުރަނީ. މިއަދުވެސް ފްލައިޓެއް އަންނާނެ.” އަމީން ވިދާޅުވިއެވެ.
ރާއްޖެއަށް އެންމެ ގިނަ ޑައިރެކްޓް ފްލައިޓްސް އަންނަ ދޯހާ އިންޓަނޭޝަނަލް އެއާޕޯޓްމިރޭ 9 ޖެހުމާ ހަމައަށް އަދި އޮތީ ބަންދުކޮށް ކަމަށާއި ބަހްރެއިން އެއާޕޯޓުވެސް ބަންދުކޮށްފައިވާ ކަމަށެވެ. އެހެންކަމުން އެ މައްސަލައަށް ހައްލެއް ހޯދުމަށް ސަރުކާރުން މަސައްކަތް ކުރަމުންދާ ކަމަށެވެ. އެގޮތުން މެދުއިރުމަތި ހުރަސްކޮށްފަ ޔޫރަޕުން މިދިޔަ ތިން ދުވަސްތެރޭ ފަސް ފްލައިޓެއް އޮޕަރޭޓް ކުރެވިއްޖެ ކަމަށާއި މިއީ މީގެ ކުރިން ފްލައިޓް އޮޕަރޭޓް ނުކުރާ ފަސް މަންޒިލު ކަމަށް ވަޒީރު ވަނީ ވިދާޅުވެފައެވެ.
