މި ސަރުކާރުގެ ބޯހިޔާވެހިކަމުގެ ސިޔާސަތުގެ ދަށުން ކުރިއަށްގެންދާ “ގޯތިގެދޮރު” ޕްރޮގްރާމްގެ ތެރެއިން، މާލޭގައި ދިރިއުޅޭ މީހުންނަށް ބިން ދޫކުރުމުގެ އުސޫލު މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓުން މިއަދު އާންމުކޮށްފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް އެކުލަވާލާފައިވާ މި އުސޫލަކީ، 18 އަހަރުން މަތީގެ ދިވެހި ރައްޔިތުންގެ ތެރެއިން ޝަރުތު ހަމަވާ ފަރާތްތަކަށް މާލެ ސަރަހައްދުންނާއި ރަސްމާލެއިން ބަންޑާރަ ގޯތި ދޫކުރުމަށް އެކުލަވާލާފައިވާ އުސޫލެކެވެ. މި ޕްރޮގްރާމްގެ ދަށުން ރަސްމާލެއިން ދޫކުރާ ކޮންމެ ގޯއްޗެއްގެ ބޮޑުމިނަކީ 1,250 އަކަފޫޓެވެ.
ހައުސިން މިނިސްޓްރީން ބުނި ގޮތުގައި ގޯތި ދޫކުރުމުގައި މައިގަނޑު ދެ ކެޓަގަރީއަކަށް ބަހާލައިގެން ކުރިއަށް ގެންދިއުމަށް ވަނީ ހަމަޖެހިފައެވެ. އެގޮތުން:
- ކެޓަގަރީ 1: މި ކެޓަގަރީގައި ހިމެނެނީ މާލޭގެ ރަށްވެއްސަކަށް ވެފައިވާތާ މަދުވެގެން އެއް އަހަރުވެފައިވާ ފަރާތްތަކެވެ. މީގެ ތެރޭގައި އުފަންވީއްސުރެ މާލޭގެ ރަށްވެހިންގެ ގޮތުގައި ތިބި މީހުންނާއި، މާލޭގެ ދަފްތަރުގައި ރަޖިސްޓްރީވެފައިވާ ފަރާތްތައް ވެސް ހިމެނެއެވެ.
- ކެޓަގަރީ 2: މި ކެޓަގަރީގެ ދަށުން ގޯތި ދޫކުރާނީ މާލޭގައި ދިރިއުޅޭ އެހެން ރަށްރަށުގެ ރަށްވެހިންގެ ތެރެއިން، އުސޫލަށް އަމަލުކުރަން ފަށާ ދުވަހާ ހަމައަށް މެދުނުކެނޑި މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށެވެ.
މީގެ އިތުރުން، ނިމިދިޔަ ސަރުކާރުގެ “ބިންވެރިޔާ” ސްކީމުން ޖޮއިންޓްކޮށް ގޯތި ލިބިފައިވާ ފަރާތްތަކުން އެ ގޯތި ދޫކޮށްލާ ނަމަ، ރަސްމާލެއިން ވަކިން ގޯތި ދިނުމުގެ ހާއްސަ އުސޫލެއް ވެސް ވަނީ ހަމަޖައްސާފައެވެ. އަދި ކުރިން ފްލެޓެއް ލިބިފައި އޮތުމުގެ ސަބަބުން ބިންވެރިޔާ ސްކީމަށް ކުރިމަތިނުލެވުނު ފަރާތްތަކަށް ވެސް މިފަހަރު ފުރުސަތު ލިބިގެންދާނެއެވެ.
ސަރުކާރުގެ އަމާޒަކީ ރަސްމާލެއިން ޖުމްލަ 15,000 ގޯތި ދޫކުރުމެވެ. އޭގެ ތެރޭގައި މާލޭ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ މީހުންނަށް 3,000 ގޯތި، އަދި ހާއްސަ އިސްކަންދޭ ކެޓަގަރީއަށް 2,000 ގޯތި ކަނޑައަޅާފައިވެއެވެ. މި މުޅި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ އާއިލީ ބޯހިޔާވެހިކަމުގެ ކޮންސެޕްޓަށް ވަރަށް ބޮޑަށް އިސްކަންދީގެންނެވެ.
މި ޕްރޮގްރާމްގެ ދަށުން ގޯއްޗަށް އެދި ހުށަހެޅުމުގެ ފުރުސަތު މި މަހުގެ 8 އިން ފެށިގެން އަންނަ މަހުގެ 30 އާ ހަމައަށް ހުޅުވާލާފައިވާ ކަމަށް ހައުސިން މިނިސްޓްރީން މައުލޫމާތު ދެއެވެ.
