ސަރުކާރުގެ ބޯހިޔާވަހިކަމުގެ ބިޔަ މަޝްރޫޢު “ބޯހިޔާވަހިކަން އެންމެންނަށް” ސިޔާސަތުގެ ދަށުން ފްލެޓާއި ގޯއްޗަށް އެދުމަށް ހުޅުވާލި ފުރުޞަތުގައި، މިހާތަނަށް 5,909 ފޯމު ހުށަހަޅާފައިވާ ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ހާމަކޮށްފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބޯހިޔާވަހިކަމުގެ ފުރުޞަތުތަކަށް “ހިޔާވެހި” ޕޯޓަލް މެދުވެރިކޮށް އޮންލައިންކޮށް ހުޅުވާލާފައިވަނީ މިދިޔަ ޖަނަވަރީ މަހުގެ 18 ވަނަ ދުވަހުއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، ވަޒީރު ޑރ. ޢަބްދުﷲ މުއްތަލިބު ވިދާޅުވީ ޕޯޓަލް މެދުވެރިކޮށް މިހާތަނަށް ގިނަ އަދަދެއްގެ ފޯމު ހުށަހަޅާފައިވާ ކަމަށާއި، އެ ފޯމުތައް ޗެކްކުރުމުގެ މަސައްކަތް މިނިސްޓްރީން ކުރިއަށްގެންދާ ކަމަށެވެ.
ވަޒީރު ހާމަކުރެއްވި ގޮތުގައި، އެކި މަރުހަލާތަކުގައި (ޑްރާފްޓް ސްޓޭޖާއި ސަބްމިޓްކޮށްފައިވާ) ޖުމްލަ 18,399 އެޕްލިކޭޝަނެއް މިހާރު ޕްރޮސެސިންގްގައި އެބަހުއްޓެވެ. އެގޮތުން:
- ގޯއްޗަށް އެދި: 2,513 ފޯމު ހުށަހަޅާފައިވާއިރު، 2,851 ފޯމު އޮތީ ޑްރާފްޓް ސްޓޭޖުގައެވެ.
- ފްލެޓަށް އެދި: 3,396 ފޯމު ހުށަހަޅާފައިވާއިރު، 8,466 ފޯމު އޮތީ ޑްރާފްޓް ސްޓޭޖުގައެވެ.
- ހިޔާވެހި ހާއްސަ ކެޓަގަރީ: 953 ފޯމު ހުށަހަޅާފައިވާއިރު، 220 ފޯމު އޮތީ ޑްރާފްޓްގައެވެ.
ސަރުކާރުން ލަފާކުރައްވާ ގޮތުގައި މި މުއްދަތު ހަމަވާއިރު 20,000 އަށްވުރެ ގިނަ އެޕްލިކޭޝަން ލިބޭނެއެވެ. އަދި މިހާތަނަށް ލިބިފައިވާ ތަރުހީބަށް ބަލާއިރު، ގޯއްޗަށްވުރެ ފްލެޓަށް އޮތް ޑިމާންޑު ބޮޑުކަން ވަޒީރު ފާހަގަކުރެއްވިއެވެ.
ބޯހިޔާވަހިކަމުގެ ޝަރުތުތަކާ ގުޅިގެން އާންމުންގެ ހުރި ކަންބޮޑުވުންތަކަށް ހައްލު ހޯދައިދިނުމުގެ ގޮތުން “ގޯތިގެދޮރު” ގެ ނަމުގައި އާ ޕްރޮގްރާމެއް ފަށަން ސަރުކާރުން ވަނީ ނިންމާފައެވެ. މި އާ އުސޫލުގެ ދަށުން ދެމަފިރިންގެ ތެރެއިން އެކަކަށް ބޯހިޔާވަހިކަމެއް ލިބިފައި އޮތަސް، އަނެކަކަށް ބޯހިޔާވަހިކަމަށް ޝަރުޜު ހަމަވާނެއެވެ. މީގެ އިތުރުން، ޖޮއިންޓްކޮށް ބޯހިޔާވަހިކަން ލިބިފައިވާ ފަރާތްތަކުން އެކަން ދޫކޮށްލަން އެއްބަސްވާނަމަ، ވަކިވަކިން ބޯހިޔާވަހިކަމަށް އެދުމުގެ ފުރުސަތުވެސް ފަހިވެގެންދާނެއެވެ.
“މީގައި މިވާގޮތުން ފިރިމީހާ ނުވަތަ އަނބިމީހާ ތަނެއް އޮތް ނަމަވެސް އެމީހަކަށް ގޯއްޗަށް ކުރިމަތިލުމުގެ ފުރުސަތު ދެވިގެން މިދަނީ. އޭރުން ފިރިމީހާ އަނބިމީހާ ފްލެޓެއް އޮތްނަމަވެސް މުސްތަޤުބަލުގައި ބިމެއް ހޯދުމުގެ ފުރުސަތު ފަހިވެގެންދޭ.” މުއްތަލިބު ވިދާޅުވިއެވެ.
މަޝްރޫޢުގެ ދަށުން ދޫކުރާ ބޯހިޔާވަހިކަން:
- ގޯތި: ޖުމްލަ 15,000 ގޯތި (ކޮންމެ ގޯއްޗަކީ 1,250 އަކަފޫޓު). މާލޭގެ ރަށްވެހިންނަށް ގްރޭޓަރ މާލެ އަދި ރަސްމާލެއިން، މާލޭގައި ދިރިއުޅޭ އެހެން ރަށްރަށުގެ މީހުންނަށް ރަސްމާލެއިން.
- ފްލެޓް: ޖުމްލަ 7,900 ފްލެޓް. އޭގެ ތެރޭގައި މާލޭ ރަށްވެހިންނަށް 4,000 ފްލެޓް، މާލޭގައި ދިރިއުޅޭ މީހުންނަށް 1,500 ފްލެޓް އަދި ހާއްސަ ކެޓަގަރީތަކަށް 2,400 ފްލެޓް ހިމެނެއެވެ.
މި މަޝްރޫޢަކީ ރާއްޖޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ރައީސް ޑރ. މުޢިއްޒުގެ ސަރުކާރުން ކުރިއަށްގެންދާ އެންމެ ބޮޑު އެއް މަޝްރޫޢެވެ.
