ޑިމާންޑް ބޮޑުވި ނަމަވެސް ސަރުކާރުން އެޅުއްވި ހަރުދަނާ ފިޔަވަޅުތަކާއި އެކު އަގުތައް އެއްވަރެއްގައި ހިފެހެއްޓިފައި ވާކަމަށް އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާ އިން ބުނެފިއެވެ.
އެ ވުޒާރާއިން ހާމަކުރިގޮތުގައި މި ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން، ގަނޑުކޮށް މުދާ ހޯދުމާއި ރަށްރަށަށް މުދާ ފޯރުކޮށްދިނުމުގައި ދުރާލައި އެޅި ހަރުދަނާ ފިޔަވަޅުތަކުގެ ސަބަބުން، މުދަލަށް އޮތް ޑިމާންޑް ބޮޑުވި ނަމަވެސް ބާޒާރުގެ އަގުތައް ވަނީ އެއްވަރެއްގައި ހިފެހެއްޓިފައެވެ.
އެގޮތުން، އަސާސީ ކާބޯތަކެތީގެ ލިސްޓަށް އިތުރުކުރެވުނު 23 ބާވަތާއެކު، ހަނޑޫ، ހަކުރު އަދި ފުށް ހިމެނޭހެން ޖުމުލަ 26 ބާވަތެއްގެ އަގު އިންތިހާއަށް އުފުލިގެން ނުދާނޭހެން އެސްޓީއޯއިން ކަނޑައަޅާފައިވާ ހެޔޮ އަގުތަކުގެ ސަބަބުން ބާޒާރުގައި ތަކެތީގެ އަގުތައް ހިފެހެއްޓިފައި ވާކަމަށް ވެސް އެ ވުޒާރާއިން ބުނެއެވެ.
ރަމަޟާން މަހުގެ ގާތްގަނޑަކަށް މެދާ ހަމައަށް އައިއިރުވެސް، ސްޓޭޓް ޓްރޭޑިންގ އޯގަނައިޒޭޝަން )އެސްޓީއޯ( އިން ވިއްކާ އަސާސީ ކާބޯތަކެތީގެ ބާވަތްތައް ރާއްޖޭގެ ހުރިހާ ސަރަހައްދަކުންވެސް ހެޔޮ އަގުގައި ލިބެން ހުރިކަން ސަރުކާރުން ކަށަވަރުކޮށްދީފިއެވެ.
