މޯލްޑިވްސް ޕޯޓްސް ލިމިޓެޑް (އެމްޕީއެލް) މެދުވެރިކޮށް ރާއްޖެއަށް އެތެރެކުރި މުދަލުގެ ތެރެއިން، ނިމިދިޔަ ހަފްތާގައި ޖުމްލަ 1،495 ކޮންޓެއިނަރުގެ މުދާ ކްލިއާކޮށްފައިވާ ކަމަށް އެ ކުންފުނީގެ ތަފާސްހިސާބުތަކުން ދައްކައިފިއެވެ.
އެމްޕީއެލްއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ ހަފްތާގައި ކްލިއާކުރި ކޮންޓެއިނަރުތަކުގެ ތެރޭގައި އާންމުކޮށް ކެއިންބުއިމަށް ބޭނުންކުރާ ގިނަ ބާވަތްތަކެއް ހިމެނޭއިރު، އެންމެ ގިނައިން ކްލިއާކޮށްފައި ވަނީ ކުކުޅު ބިހެވެ. އެގޮތުން 21،761 ޕެކޭޖުގެ ބިސް ވަނީ ކްލިއާކޮށްފައެވެ. އެހެން ދުވަސްތަކާ ހިލާފަށް މި ރަމަޟާންމަހު އެންމެ ގިނައިން އެތެރެކޮށްފައި ވަނީ ފިޔައާއި ކަރައެވެ. އެގޮތުން މިދިޔަ ހަފްތާގައި 15،229 ޕެކޭޖުގެ ކަރާ އަދި 14،547 ޕެކޭޖުގެ ފިޔާ ވަނީ ކްލިއާކޮށްފައެވެ.
ހަމައެއާއެކު ރާއްޖެއަށް މުދާ އެތެރެކުރާ ތިން ކޮންޓެއިނާ ވެސެލް އަދި ނުވަ ޖެނެރަލް ކާގޯ ވެސެލްގެ މުދާ އެމްޕީއެލުން ވަނީ ކްލިއާކޮށްފައެވެ. އެގޮތުން ކޮންޓެއިނާ ވެސެލްއިން1،100 ޓަނުގެ މުދާ ކްލިއާކުރިއިރު505 ޓަނުގެ ޖެނެރަލް ކާގޯ ވަނީ ކްލިއާކޮށްފައެވެ.
މީގެ އިތުރުން ކްލިއާކުރި ބާވަތްތަކުގެ ތެރޭގައި އަލުވި، ޓޮމާޓޯ، ކެބެޖް، އަލަނާސި، ދޮންކެޔޮ، ބަރަބޯ، ސްވީޓް މެލަންގެ އިތުރުން ގިނަ ބާވަތްތަކުގެ ތަރުކާރީއާ މޭވާ ހިމެނެއެވެ.
ކޮންމެ ހަފްތާއަކުވެސް އެމްޕީއެލްއިން ދަނީ ބަނދަރުން ކްލިއާކުރާ މުދަލުގެ ތަފްސީލީ މައުލޫމާތު އާންމުންނަށް ހިއްސާކުރަމުންނެވެ. މި މަސައްކަތުގެ ބޭނުމަކީ ބާޒާރުގައި މުދާ ހުރި މިންވަރާއި، މުދާ ކްލިއާކުރުމުގެ ދުވެލި ހުރި ގޮތް ހާމަކުރުމެވެ.
