އައްޑޫގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ހައްޔަރު ކޮށްފައިވާ 6 މީހެއްގެ މައްޗަށް ކުށް ސާބިތު ކުރެވޭ ވަރަށް މިހާތަނަށް ހެކި ނުލިބޭތީ އެ މީހުން ދޫކޮށްލަން ޕީޖީ އޮފީހުން ފުލުހުންނަށް ލަފާދީފި އެވެ.
އެ މީހުން ހައްޔަރު ކޮށްފައިވަނީ މިދިޔަ އަހަރުގެ ނޮވެމްބަރުމަހު ހައްޔަރުކުރީ 2017 ވަނަ އަހަރުން ފެށިގެން އައްޑޫގައި މަސްތުވާތަކެތީގެ ވިޔަފާރިކޮށް، އެތައް މިލިއަން ރުފިޔާއެއް ދައުރުކުރި ކަމުގެ ތުހުމަތުގައި ފުލުހުން ހިންގި ޚާއްސަ އޮޕަރޭޝަނެއްގެ ދަށުންނެވެ.
ޕީޖީ އޮފީހުން ބުނީ، އެ ހަ މީހުންގެ މައްސަލަ ތަހުގީގު ކުރުމަށް ގާނޫނުގައި ކަނޑައަޅާފައިވާ މުއްދަތު ހަމަވުމާ ހަމައަށް ލިބިފައިވާ ހެއްކާއި ގަރީނާ ވަޒަންކޮށް ބެލިއިރު، ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީލޯންޑަ ކުރިކަން ގާނޫނުގައި ބުނާ މިންގަނޑަށް ސާބިތު ކޮށްދެވޭ މިންވަރަށް ހެއްކާއި ގަރީނާ ލިބިފައި ނުވާ ކަމަށެވެ.
ޕީޖީން ބުނީ، ހައްޔަރުކުރި މީހުންގެ މައްޗަށް ދައުވާ ކުރެވޭ މިންވަރަށް މިވަގުތަށް ހެއްކާއި ގަރީނާ ލިބިފައި ނުވާތީ މައްސަލަ “ޑިކްލައިން” ކުރިޔަސް، އައު ހެކި ލިބިއްޖެ ހާލަތެއްގައި، ޖިނާއީ އިޖުރާއަތުގެ ގާނޫނުގެ ދަށުން އަލުން ދައުވާ ކުރުމަށް ހުށަހަޅަން ފުލުހުންނަށް ލަފާދީފައިވާނެ ކަމަށެވެ.
އެ މީހުން ބަންދުކުރަން އެންމެ ފަހުން ދީފައިވާ މުއްދަތު އިއްޔެ ވަނީ ހަމަވެފަ އެވެ.
