ރާއްޖޭގެ ދަނޑުވެރިކަމުގެ ދާއިރާ ހަރުދަނާކޮށް، މި ދާއިރާގައި ހަރަކާތްތެރިވާ ފަރާތްތަކުގެ ސައްހަ މައުލޫމާތު އެއްކުރުމަށްޓަކައި މިއަހަރުގެ ތެރޭގައި “އެގްރިކަލްޗާ ސެންސަސް” ނުވަތަ ދަނޑުވެރިންގެ ބޯހިމެނުމުގެ މަސައްކަތް ފެށުމަށް ސަރުކާރުން ނިންމައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިކަން އިޢުލާނު ކުރެއްވީ މިނިސްޓަރ ފޯ އެގްރިކަލްޗާ އެންޑް އެނިމަލް ވެލްފެއާ، ޑރ. މަރްޔަމް މާރިޔާ އެވެ. ވަޒީރު ވިދާޅުވީ ދަނޑުވެރިކަމުގެ ދާއިރާގެ ތަފާސްހިސާބުތައް ދެނެގަތުމަކީ ދާއިރާގެ ކުރިއެރުމަށް އެޅޭ މުހިންމު ފިޔަވަޅެއް ކަމަށެވެ.
“މި މަސައްކަތުގެ ސުވާލު ކަރުދާސް ތައްޔާރުކުރެވި ޕްރީ ޓެސްޓިން މަރުހަލާ މިހާރު ވަނީ ނިމިފަ. މިއަހަރުތެރޭ ދަނޑުވެރިކަމުގެ ސެންސަސްގެ މައުލޫމާތު ނެގުމުގެ މަސައްކަތް ފެށިގެންދާނެ.” ވަޒީރު ވިދާޅުވިއެވެ.
ސެންސަސްއަށް ބޭނުންވާ ސުވާލު ކަރުދާސް ތައްޔާރުކޮށް، ޕްރީ-ޓެސްޓިންގ މަރުހަލާ މިހާރު ވަނީ ނިމިފައެވެ. މި މަސައްކަތަކީ ދަނޑުވެރިކަމާ ބެހޭ ވުޒާރާއާއި، މޯލްޑިވްސް ބިއުރޯ އޮފް ސްޓެޓިސްޓިކްސްގެ އިތުރުން އެފް.އޭ.އޯ ގުޅިގެން ކުރިއަށްގެންދާ މަޝްރޫއެކެވެ.
މިއަހަރުގެ ތެރޭގައި ދަނޑުވެރިންގެ މަޢުލޫމާތު ނެގުމުގެ އަމަލީ މަސައްކަތް ފެށިގެންދާނެއެވެ.
މީގެ އިތުރުން، ދަނޑުވެރިކަމުގެ މަޢުލޫމާތުތައް ދެމެހެއްޓެނިވި ގޮތެއްގައި އެއްކޮށް ބެލެހެއްޓުމަށްޓަކައި “އެގްރިކަލްޗާ ޑާޓާ އެޕްލިކޭޝަނެއް” ތައްޔާރުކުރުމުގެ މަސައްކަތްވެސް ކުރަމުންދާ ކަމަށް ވަޒީރު ފާހަގަކުރެއްވިއެވެ. މި އެޕްލިކޭޝަންގެ ސަބަބުން ސައްހަ މަޢުލޫމާތުގެ މައްޗަށް ބިނާކޮށް ސިޔާސަތުތައް ކަނޑައެޅުމަށް ފަސޭހަވެގެންދާނެއެވެ.
ދަނޑުވެރިންނަށް އެހީތެރިވުމުގެ ގޮތުން ދޫކުރާ “ނަފާ ލޯނު” ޕްރޮގްރާމަށް ބޮޑު ތަރުހީބެއް ލިބެމުންދާކަން ފާހަގަކުރައްވައި، ވަޒީރު ވިދާޅުވީ މިހާތަނަށް ޖުމްލަ 54 ފަރާތަކަށް ލޯނު ދޫކުރެވިފައިވާ ކަމަށެވެ. އޭގެ ތެރޭގައި ހިމެނެނީ:
44 ފިރިހެން ދަނޑުވެރިން
5 އަންހެން ދަނޑުވެރިން
5 ކުންފުނި އެވެ.
ދަނޑުވެރިކަމުގެ ހުނަރު ތަރައްޤީކުރުމަށް ކުރެވޭ މަސައްކަތުގެ ދަށުން، މިދިޔަ އަހަރުގެ ނިޔަލަށް ރާއްޖޭގެ 31 ރަށެއްގައި ތަމްރީނު ޕްރޮގްރާމްތައް ހިންގާފައިވާ ކަމަށްވެސް މިނިސްޓަރ މާރިޔާ ވިދާޅުވިއެވެ. މި ތަމްރީނުތަކުގައި ޖުމްލަ 845 ފަރާތަކުން ވަނީ ބައިވެރިވެފައެވެ.
މި ސަރުކާރުގެ އަމާޒަކީ ޒަމާނީ ވަސީލަތްތަކާއި މައުލޫމާތުގެ އެހީގައި ރާއްޖޭގެ ކާނާގެ ރައްކާތެރިކަން ކަށަވަރުކޮށް، ދަނޑުވެރިކަމަކީ ނަފާލިބޭ ސިނާޢަތަކަށް ހެދުމެވެ.
