މެދުއިރުމަތީގެ ހަމަނުޖެހުންތަކާ ގުޅިގެން ބައިނަލްއަޤްވާމީ ބާޒާރުގައި ތެލުގެ އަގުތަކަށް ބަދަލުތަކެއް އައި ނަމަވެސް، ރާއްޖޭގެ ތެލުގެ ސްޓޮކްގައި އެއްވެސް މައްސަލައެއް ނެތް ކަމުގެ ޔަގީންކަން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދު ދެއްވައިފި އެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ސަޢީދު ވިދާޅުވީ، ބައިނަލްއަޤްވާމީ މާކެޓުތަކުގައި އިއްޔެ އެކަނިވެސް ތެލުގެ އަގު %25 އާއި %30 އާ ދެމެދުގެ މިންވަރަކަށް އުފުލިފައިވާ ކަމަށެވެ. ނަމަވެސް، ސަރުކާރުން ފިޔަވަޅުތައް އަޅަމުންދަނީ މިފަދަ ބަދަލުތަކަށް ދުރާލާ ވިސްނައިގެން ކަމަށްވާތީ، ރާއްޖެ ތެލަށް ނުޖެހޭނެ ކަމުގެ ފުރިހަމަ އިތުބާރު އެބައޮތް ކަމަށް އެމަނިކުފާނު ވިދާޅުވިއެވެ.
“އިއްޔެ ރައީސް ފާހަގަކުރެއްވި ގޮތަށް އަޅުގަނޑުމެންނަށް އަދި އެއްވެސް ކަންބޮޑުވުމެއް ނެތް. ކުރުކޮށް ދަންނަވާ ނަމަ ތެލަކަށް ނުޖެހޭނެ، އިރާދަކުރެއްވިއްޔާ. އެލްޕީޖީ ވެސް އަދި ތެޔޮ ވެސް ހިމަނައިގެން މި ދެންނެވީ،” ވަޒީރު ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، ރާއްޖެއަށް ޒިޔާރަތްކުރާ ފަތުރުވެރިންނާއި ރާއްޖޭގައި ދިރިއުޅޭ އާބާދީ އިތުރުވަމުންދާތީ، ތެޔޮ ރައްކާކުރާނެ ކެޕޭސިޓީ އިތުރުކުރުމުގެ މަސައްކަތް ސަރުކާރުން ދަނީ ކުރަމުންނެވެ. އަދި ކާބޯތަކެއްޗާއި ތެލުގެ ރައްކާތެރިކަން ކަށަވަރުކުރުމަށްޓަކައި މުދާ ގެންނާނެ އިތުރު ރޫޓުތައް ހޯދުމުގެ މަސައްކަތްވެސް ކުރިއަށްދާ ކަމަށް ވިދާޅުވިއެވެ.
މެދުއިރުމަތީގެ މަސްރަހު ނުތަނަވަސްވަމުންދާ މި ދަނޑިވަޅުގައިވެސް، ރާއްޖެއަށް ބޭނުންވާ ތެޔޮ ލިބުމުގައި ދަތިކަމެއް ނެތްކަން ހާމަކުރައްވަމުން ވަޒީރު ވިދާޅުވީ، މިހާރުވެސް ރާއްޖެއަށް ތެޔޮ ޝިޕްމަންޓެއް އަންނަމުންދާ ކަމަށެވެ. އަދި އާންމުކޮށް ބޭނުންކުރާ ތެލުގެ އިތުރުން، މަތިންދާ ބޯޓުތަކަށް އަޅާ ތެލުގެ ސްޓޮކްގައިވެސް އެއްވެސް މައްސަލައެއް ނެތް ކަމަށް ވަޒީރު ވިދާޅުވިއެވެ.
“ތެޔޮ ރައްކާކުރާނެ ކެޕޭސިޓީ އިތުރު ކުރުމަށް ވެސް ސަރުކާރުން ދަނީ މަސައްކަތްތަކެއް ކުރަމުން. ފްލޯޓިން އާބާދީއަކާއި ރާއްޖޭގެ އާބާދީ އާއި އަންނަ ފަތުރުވެރިންގެ އަދަދު އެއްކޮށްލީމާ ކުރީގެ ހާލަތްތަކަށް ބަލާއިރު ކޮންސިއުމް ކުރާ މީހުންގެ އަދަދު ވަނީ އިތުރުވެފައި. އެހެންވެ މި ހަގީގަތްތަކަށް ވެސް ބަލައިގެން މުސްތަގުބަލަށް ކަންތައްތަކެއް އެބަ ރޭވޭ. މީގެ ކުރިން މުދާ ރައްކާ ކުރާ މިންވަރަށް ވުރެ އިތުރަށް މުދާ ރައްކާ ކުރެވޭނެ ގޮތްތަކެއް.” ވަޒީރު ވިދާޅުވިއެވެ.
އަދި މަތިންދާ ބޯޓުތަކަށް އަޅާ ތެލުގައިވެސް މައްސަލައެއް ނެތްކަމަށާއި މި ހާލަތު ސަރުކާރުން ވަރަށް ގާތުން ބަލަމުންދާކަމަށް ވިދާޅުވިއެވެ. ވަޒީރު ސައީދު ވިދާޅުވީ އެސްޓީއޯއާއި އެ ވުޒާރާގެ އިތުރުން މާލީ ވުޒާރާއާ ގުޅިގެން ވަރަށް ގާތުން މަސައްކަތްތައް ކުރަމުން ގެންދާ ކަމަށެވެ.
މި ހާލަތު ސަރުކާރުން ވަރަށް ގާތުން ބަލަމުންދާކަން ފާހަގަކުރައްވައި، ވަޒީރު ވިދާޅުވީ އެސްޓީއޯ އާއި އިޤްތިޞާދީ ވުޒާރާގެ އިތުރުން މާލީ ވުޒާރާ ގުޅިގެން މެދުނުކެނޑި މަސައްކަތް ކުރަމުންދާ ކަމަށެވެ. ސަރުކާރުގެ އެންމެ ބޮޑު އަމާޒަކީ ބައިނަލްއަޤްވާމީ ބާޒާރަށް އަންނަ ލޮޅުންތަކުގެ ސަބަބުން ރައްޔިތުންނަށް އުފުލަންޖެހޭ ތަކުލީފުތައް ވީހާވެސް ކުޑަކޮށް، ލުއި ފަސޭހަ ގޮތްތަކެއް ހަމަޖައްސައިދިނުން ކަމަށްވެސް ވަޒީރު ސައީދު ވިދާޅުވިއެވެ.
