ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ޖެއްސީ އެމެރިކާގެ އާންމު ދަތުރުފަތުރުކުރާ “ސިވިލިއަން” ބޯޓެއް ކަމަށާއި، އެއީ ހަނގުރާމައާ އެއްވެސް ގުޅުމެއް ހުރި ފްލައިޓެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، އެމެރިކާގެ ހަނގުރާމަމަތީ ބޯޓެއް ރާއްޖޭގައި ޖައްސާފައިވާ ކަމަށް ބުނެ މީސްމީޑިއާގައި ދައުރުވަމުންދާ ޚަބަރުތަކާ ގުޅިގެން މައުލޫމާތު ސާފުކުރައްވާފައިވާ ކަމަށެވެ. އަދި އެއީ ހަނގުރާމަމަތީ ބޯޓެއް ނޫން ކަމަށާއި، އެއީ އާންމު ބޯޓެއްކަން ކަށަވަރުވެފައިވާ ކަމަށް އެމަނިކުފާނު ވިދާޅުވިއެވެ.
“އެއީކީ ހަނގުރާމަ މަތީ މަތިންދާ ބޯޓެއް ނޫން. އަޅުގަނޑަށްވެސް މައުލޫމާތު ލިބިގެން ހޯދިއިރުގަ އެއީ އެމީހުންގެ ސިވިލިއަން އެއާކްރާފްޓެއް. ހުއްދަވެސް އޮތީ މާކުރިން ނަގާފަ،” ރައީސް ވިދާޅުވިއެވެ.
ރައީސް އިތުރަށް ހާމަކުރެއްވި ގޮތުގައި، އެ ބޯޓު ވީއައިއޭގައި ޖެއްސުމުގެ ހުއްދަ ނަގާފައިވަނީ މިދިޔަ ޖެނުއަރީ 17 ވަނަ ދުވަހުއެވެ. އެ ބޯޓު ރާއްޖޭގައި ޖެއްސުމަށްފަހު ފުރައިގެން ދިޔައީ ސީޝެލްސްގައި މަޑުކުރުމަށްފަހު ތައިލެންޑަށެވެ. އެހެންކަމުން، އެއީ އެއްވެސް ހާލެއްގައި ހަނގުރާމައެއްގައި ބައިވެރިވާ ނުވަތަ އެފަދަ ކަމަކާ ގުޅުންހުރި ބޯޓެއް ނޫން ކަމަށް ރައީސް ތަކުރާރުކޮށް ވިދާޅުވިއެވެ.
މެދުއިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި، އެމެރިކާގެ ބޯޓެއް ރާއްޖޭގެ މައި އެއާޕޯޓަށް ޖެއްސުމުން ބައެއް ފަރާތްތަކުން ވަނީ ކަންބޮޑުވުން ފާޅުކޮށް ފާޑުކިޔާފައެވެ. ނަމަވެސް ރައީސް ވިދާޅުވީ، އެ ބޯޓަކީ ކަނޑައެޅިފައިވާ ގަވާއިދުތަކުގެ ތެރެއިން ހުއްދަ ހޯދައިގެން ޖެއްސި ބޯޓެއް ކަމަށާއި، އެކަމުގެ ސަބަބުން ރާއްޖެއަށް ލިބޭނެ އެއްވެސް ގެއްލުމެއް ނެތް ކަމަށެވެ.
މީގެ އިތުރުން، އެމެރިކާ އާއި އިސްރާއީލުން އިރާނަށް ހަމަލާދެމުންދާ ވަގުތެއްގައި، ވެލާނާ އެއާޕޯޓުން އެމެރިކާގެ ހަނގުރާމަމަތީ ބޯޓަކަށް ތެޔޮ އަޅައިދިން ކަމަށް ބުނެ ފަތުރަމުންދާ ވާހަކަތައް ވެސް ރައީސް ޑރ. މުއިއްޒު ވަނީ މިއަދު ދޮގުކުރައްވާފައެވެ.
