ލޯނުތަކުގެ ގޮތުގައި ނަގާފައިވާ ދަރަނިތައް ދެއްކުމަށް މި ސަރުކާރުން މިހާރު ފައިސާ އެއްކޮށްފައިވާ ކަމަށާއި، މާދަމާ ދައްކަން ޖެހުނަސް އެ ފައިސާ ދެއްކޭވަރަށް ދައުލަތުގެ ބަޖެޓުގައި ފައިސާ އެބަހުރި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ސަރުކާރުން ދައްކަންޖެހޭ 500 މިލިއަން ޑޮލަރުގެ ސުކޫކު 8 އެޕްރީލް 2026 ގައި ދެއްކުމަށް މިހާރު ނިންމާފައިވާ ކަމަށެވެ. އަދި އެ ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނު ކަމުގައިވިޔަސް، އެކަން ކުރެވޭނެ ފަދަ މާލީ ގާބިލުކަން ސަރުކާރުގައި އެބަހުރިކަމުގެ ޔަގީންކަން ރައީސް ދެއްވިއެވެ.
ރައީސް ވިދާޅުވި ގޮތުގައި ސުކޫކު ދެއްކުމަށްޓަކައި މިހާރުވެސް 650 މިލިއަން ޑޮލަރަށްވުރެ ގިނަ ފައިސާ ވަނީ ރައްކާކުރެވިފައެވެ. އަދި ރާއްޖޭގެ ގްރޮސް ރިޒާވް 1.27 ބިލިއަން އެމެރިކާ ޑޮލަރަށް އަރާފައިވާކަން ފާހަގަކުރައްވަމުން ރައީސް ވިދާޅުވީ، މިއީ ރާއްޖޭގެ ތާރީޚުގައިވެސް ގްރޮސް ރިޒާވް މިހާ މައްޗަށް ދިޔަ ފުރަތަމަ ފަހަރު ކަމަށެވެ.
“ރޭގެ ނިޔަލަށް އެސްޑީއެފް (ސޮވެރިން ފަންޑު) ގައި 320 މިލިއަން ޑޮލަރަށްވުރެ ގިނައިން އެބަހުރި ރައްކާކޮށްފައި. ޔޫސަބަލް ރިޒާވްގައި 330 މިލިއަން ޑޮލަރަށްވުރެ ގިނަ ފައިސާ އެބަހުރި. އެހެންވީމާ ޖުމްލަ 650 މިލިއަން ޑޮލަރަށްވުރެ ގިނަ ފައިސާ އެބަހުރި ރައްކާކޮށްފައި،” ރައީސް ވިދާޅުވިއެވެ.
މީގެ އިތުރުން، މިއަހަރުގެ ބާކީ އޮތް ބަޔަށް ބޭނުންވާ އިތުރު ފައިސާ ހޯދުމުގެ މަސައްކަތްތައްވެސް ވަރަށް ބާރަށް ކުރިއަށްދާ ކަމަށް ރައީސް ވިދާޅުވިއެވެ. ދަރަނި ދެއްކުމާ ގުޅޭގޮތުން އެއްވެސް ކަންބޮޑުވުމެއް ނެތްކަން ހާމަކުރައްވަމުން ރައީސް ވިދާޅުވީ، ބޭރުގެ މާލީ އިދާރާތަކާއެކު ކުރެވެމުންދާ މަޝްވަރާތައް ނިމުމަކާ ގާތްވެފައިވާ ކަމަށެވެ.
“ވަރަށް ކާމިޔާބު މުޢާމަލާތްތައް ކުރިއަށްދޭ، ނެގޯސިއޭޝަންސް ކޮންކުލޫޑުވާ ހިސާބަށް ގޮސްފައިވަނީ، ދަރަނި ދެއްކުމަށް އެއްވެސް ކަންބޮޑުވުމެއް ނެތް، އިގްތިސޯދު މެނޭޖްކުރަމުން މި ދަނީ ބޭރަށް ދައްކަން ޖެހޭ ދަރަނި އާއި އެތެރޭގެ ދަރަނި ދެއްކޭގޮތަށް،” ރައީސް ވިދާޅުވިއެވެ.
ސަރުކާރުން ހާމަކޮށްފައިވާ ގޮތުގައި، ސުކޫކަށް ފައިސާ ދެއްކުމުގެ ތަވާލާ އެއްގޮތަށް މިހާތަނަށްވެސް އެއްވެސް މެދުކެނޑުމެއްނެތި ފައިސާ ދައްކަމުންދެއެވެ. މިއީ ރާއްޖޭގެ މާލީ ހާލަތު ރަނގަޅުވަމުންދާކަމުގެ ހެއްކެއްގެ ގޮތުގައި ސަރުކާރުން ސިފަކުރެއެވެ.
