މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން ރާއްޖެއަށް ތެލާއި ކާބޯތަކެތި އެތެރެކުރުމުގައި އެއްވެސް ދައްޗެއް ނެތްކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވައިފި އެވެ.
ރައީސުލްޖުމްހޫރިއްޔާ މިކަން ހާމަކުރެއްވީ، މެދުއިރުމަތީގެ މަސްރަޙަށް އަންނަމުންދާ ބަދަލުތަކާ ގުޅިގެން ސަރުކާރުން އަޅަމުންދާ ފިޔަވަޅުތަކުގެ މަޢުލޫމާތު ހިއްސާކުރެއްވުމަށް ބޭއްވި ނޫސްވެރިންގެ ބައްދަލުވުމެއްގަ އެވެ.
ރައީސް ވިދާޅުވީ މެދުއިރުމަތީގެ ހާލަތުގެ ސަބަބުން ރާއްޖެއަށް ކޮށްފާނެ އަސަރުތައް ދެނެގަނެ، އެކަންކަމަށް އަވަސް ފިޔަވަޅު އެޅުމަށްޓަކައި ވަޒީރުންގެ ޚާއްޞަ ކޮމެޓީއެއް އެކުލަވާލައްވާފައިވާ ކަމަށެވެ. މި ކޮމެޓީން ކަމާގުޅުންހުރި ހުރިހާ ދާއިރާތަކުން ކަންކަން ވަރަށް ގާތުން ބަލަމުންދާކަން އެމަނިކުފާނު ފާހަގަކުރެއްވިއެވެ. އޭގެ ތެރޭގައި ރާއްޖެއިން ބޭރުގައި އުޅޭ ދިވެހިންނާއި ކިޔަވާ ކުދިންގެ ހާލަތު ބެލުންވެސް ހިމެނެއެވެ.
އިޤްތިޞާދީ ގޮތުން ކުރިމަތިވެދާނެ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، ރާއްޖެއަށް ބޭނުންވާ ތެލާއި ކާބޯތަކެތި ލިބުމުގައި މިވަގުތު އެއްވެސް ހުރަހެއް ނެތް ކަމަށެވެ.
“ތެލަށް އިރާދަކުރެއްވިއްޔާ އެއްވެސް ވަރެއްގެ ކަންބޮޑުވުމެއް އަޅުގަނޑުމެންނަކަށް ދިމަލެއްނުވޭ. އަޅުގަނޑުމެންނަށް ހަމަ ރަނގަޅަށް އެކަން އޮތީ ހަމަޖެހިފައި. އެއްވެސް ވަރަކަށް ތެޔޮ ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް އަދި ނެތް އެއްވެސް ވަރަކަށް ކަންބޮޑުވާންޖެހޭ ކަހަލަ އެއްވެސް ކަމެއް އިރާދަކުރެއްވިއްޔާ. ތެލުގެ އިޝޫއެއް ނެތް. ކާބޯތަކެތީގެ އިޝޫ އެއްވެސް ނެތް،”
މީގެއިތުރުން، މި ހާލަތުގެ ސަބަބުން ރާއްޖޭގެ ފަތުރުވެރިކަމަށް ކޮށްފާނެ ނޭދެވޭ އަސަރުތައް ކުޑަކުރުމަށް ސަރުކާރުން މުހިންމު މަސައްކަތްތަކެއް ކުރަމުންދާކަން ރައީސް ހާމަކުރެއްވިއެވެ. އެގޮތުން މެދުއިރުމަތިން ޓްރާންސިޓްކޮށް ރާއްޖެއަށް އަންނަ ފްލައިޓްތައް އެހެން މަގުތަކުން ރާއްޖެއަށް އާދެވޭނެ އިންތިޒާމްތައް އެއަރލައިންތަކާ ގުޅިގެން ހަމަޖައްސަމުންދާ ކަމަށް އެމަނިކުފާނު ވިދާޅުވިއެވެ.
“ރާއްޖޭގެ ފަތުރުވެރިކަމަށް ހާއްސަގޮތެއްގައި މީގެ އަސަރުކުރޭ، އެއީ ވަރަށް ގިނަ ޓްރާންސިޓް ފްލައިޓްތައް މިއަންނަނީ މެދުއިރުމަތީގެ އެކިއެކި އެއާލައިންތަކުން، އެކިއެކި އެއާޕޯޓްތައް ބޭނުންކޮށްގެން. މިހާރު އެއާ ސްޕޭސް ކްލޯސްކޮށްފަ ހުރި ތަންތަން އެއީ. އޭގެ ސަބަބުން ރާއްޖޭގައި ނުފުރިފަ އެބަތިބި ވަރަށް ގިނަ މީހުން. ރާއްޖެ އަންނަން ބޭނުންވި މީހުންނަށް ނާދެވި، އޭގެ ސަބަބުން ފުރަން ތިބި މީހުންނަށް ނާދެވި ދިމާވެފަވެސް އެބަހުރި.” ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ދަތުރުފަތުރުގެ ދަތިކަމާހުރެ ރާއްޖެއިން ނުފުރި ތިބި ފަތުރުވެރިންނަށް އެހެނިހެން އެއަރލައިންތަކުން ފުރުސަތު ހޯދައިދީ، އެމީހުން އެނބުރާ ޤައުމަށް ދެވޭނެ އިންތިޒާމްތައް ހަމަޖެއްސުމުގެ މަސައްކަތްވެސް ސަރުކާރުން ކުރިއަށްގެންދާ ކަމަށެވެ. ސަރުކާރުގެ އަމާޒަކީ ބައިނަލްއަޤްވާމީ މަސްރަޙަށް އަންނަ މިފަދަ ބަދަލުތަކުގެ ސަބަބުން ރާއްޖޭގެ ރައްޔިތުންނަށާއި އިޤްތިޞާދަށް ކުރާ އަސަރު ވީހާވެސް ކުޑަކުރުން ކަމަށް ރައީސުލްޖުމްހޫރިއްޔާ ވިދާޅުވިއެވެ.
