މެދުއިރުމަތީގެ ގައުމުތަކުގައި މިހާރު ހިނގަމުންދާ ހަނގުރާމަވެރި ހާލަތާ ގުޅިގެން، އެ ސަރަހައްދުގެ އިސްލާމީ ގައުމުތަކުގެ ވެރިންނަށް ގުޅުއްވައި ރާއްޖޭގެ ފުރިހަމަ ތާއީދާއި އެއްބާރުލުން އޮތްކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފި އެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މެދުއިރުމަތީގެ މަސްރަހު ގޯސްވަމުންދާތީ އެކަމުގެ ކަންބޮޑުވުން ރާއްޖެއިން ފާޅުކުރާ ކަމަށެވެ. އަދި ބޭރު ގައުމުތަކުގައި ތިބި ދިވެހިންގެ ރައްކާތެރިކަން ކަށަވަރުކުރުމަށް ސަރުކާރުން ހާއްސަ އިސްކަމެއް ދީގެން މަސައްކަތް ކުރަމުންދާ ކަމަށް އެމަނިކުފާނު ވިދާޅުވި އެވެ.
ރައީސް މުއިއްޒު ވިދާޅުވި ގޮތުގައި، ހަނގުރާމައިގެ ސަބަބުން ކުރިމަތިވަމުންދާ ގޮންޖެހުންތަކާ ގުޅޭގޮތުން މަޝްވަރާކުރެއްވުމަށް ރޭގެ ވަގުތެއްގައި ޔޫއޭއީގެ ރައީސްއާ ފޯނުން ގުޅުއްވައި ވާހަކަފުޅު ދައްކަވާފައިވާނެ އެވެ. މީގެ އިތުރުން، މިއަދުގެ ވަގުތެއްގައި ސައުދީ އަރަބިއްޔާގެ ކްރައުން ޕްރިންސް މުހައްމަދު ބިން ސަލްމާންގެ އިތުރުން ގަތަރު، ބަހްރެއިން އަދި އޮމާންގެ އިސްވެރިންނަށް ގުޅުއްވައި، މި ދަނޑިވަޅުގައި ދިވެހި ރައްޔިތުން ތިބީ އެ ގައުމުތަކާ އެކުގައިކަމުގެ ޔަގީންކަން ދެއްވާނެ ކަމަށް ރައީސް ވިދާޅުވި އެވެ.
“އިރާނުން ދެމުންދާ ހަމަލާތަކާ ގުޅިގެން ލިބެމުންދާ ގެއްލުންތަކާއި، މީހުން މަރުވަމުންދާ ދިއުމަކީ ހިތާމަހުރި ކަމެއް. ރާއްޖޭގެ ސަޕޯޓު އެ ގައުމުތަކަށް އޮތްކަން އަޅުގަނޑު ވާނީ ދަންނަވާފައި،”
މެދުއިރުމަތީގެ ހަމަނުޖެހުންތަކުގެ ސަބަބުން ރާއްޖޭގެ އިގްތިސާދަށް ކޮށްފާނެ އަސަރުތަކަށް އަލިއަޅުއްވާލައްވަމުން ރައީސް ވިދާޅުވީ، ރާއްޖެއަކީ ކާބޯތަކެއްޗާއި ތެލުގެ އިތުރުން ފަތުރުވެރިކަމަށްވެސް އެ ސަރަހައްދަށް ބަރޯސާވާ ގައުމަކަށް ވާތީ، ރާއްޖޭގެ މަސްލަހަތު ހިމާޔަތްކުރުމަށް ފިޔަވަޅުތަކެއް އަޅަމުންދާ ކަމަށެވެ.
ހާއްސަކޮށް ވައިގެ ސަރަހައްދުތައް ބަންދުކުރުމުގެ ސަބަބުން ފަތުރުވެރިކަމަށް ބައެއް ދަތިތައް ކުރިމަތިވެ، ފްލައިޓްތައް ކެންސަލްވުމުން ރާއްޖޭގައި ތިބި ބައެއް ފަތުރުވެރިންނަށް ނުފުރިފައިވާކަން އެމަނިކުފާނު ފާހަގަކުރެއްވި އެވެ.
“އެއްވެސް ވަރަކަށް ތެޔޮ ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް އަދި ނެތް އެއްވެސް ވަރަކަށް ކަންބޮޑުވާންޖެހޭ ކަހަލަ އެއްވެސް ކަމެއް ތެލުގެ އިޝޫއެއް ނެތް. ކާބޯތަކެތީގެ އިޝޫ އެއްވެސް ނެތް.”
ނަމަވެސް، މި ހާލަތުގައިވެސް ރާއްޖެއަށް ބޭނުންވާ ތެލުގެ އިންތިޒާމުތައް ހަމަޖެހިފައިވާ ކަމަށާއި، ކުރިޔަށް އޮތް ދުވަސްތަކުގައި ތެލުގެ ތާށިކަމެއް ކުރިމަތިވެދާނެ ކަމުގެ ބިރެއް ނެތް ކަމަށް ވިދާޅުވެ ރައީސް ވަނީ ރައްޔިތުންނަށް އިތުބާރު ދެއްވާފައެވެ.
