މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ އުޅަނދުފަހަރު އެޅުމަށް ބޭނުންކުރާ މޫރިންގ ބޮއެތައް މަރާމާތްކުރުމުގެ މަސައްކަތުގެ ތެރެއިން، ފުރަތަމަ ބޮއެގެ މަސައްކަތް ނިންމައި މިއަދު އަލުން ހަރުކޮށްފިއެވެ. މިއީ ބަނދަރުގެ އޮޕަރޭޝަންތައް ހަރުދަނާކުރުމަށް އެ ކުންފުނިން ކުރިއަށްގެންދާ މުހިންމު މަސައްކަތެކެވެ.
މި މަސައްކަތުގެ އެންމެ ހާއްސަ ކަމަކީ، މީގެ ކުރިން އަމިއްލަ ކުންފުނިތަކާ ހަވާލުކޮށްގެން ކުރަމުން އައި މި މަސައްކަތް، މިފަހަރު އެމް.ޕީ.އެލްގެ އަމިއްލަ މުވައްޒަފުން ކުރިއަށް ގެންދިއުމެވެ. މިގޮތުން ބޮއެ މަރާމާތްކުރުމާއި ކަނޑު އަޑީގައި ބޮއެ ހަރުކުރުމުގެ ހުރިހާ މަސައްކަތެއްވެސް ކޮށްފައިވަނީ ކުންފުނީގެ ފްލީޓް ސަރވިސަސް ޑިޕާޓްމަންޓްގެ މެރިން ފްލީޓް ސެކްޝަންގެ މުވައްޒަފުންނާއި އެ ސެކްޝަންގެ ޑައިވަރުންނެވެ.
މޫރިންގ ބޮއެތައް އަލުން ބޭނުންކުރަން ފެށުމުން، މާލޭ ވިޔަފާރި ބަނދަރުގެ ހުޅަނގު ފަރާތު ކީވޯލް ސަރަހައްދުގައި ކުރިއަށްދާ އެހެނިހެން އޮޕަރޭޝަންތަކަށް ބޮޑު ލުޔެއް ލިބިގެންދާނެއެވެ. އަދި ޓަގު ފަހަރާއި ބާޖުތައް އެޅުމަށް ހާއްސަ ސަރަހައްދެއް ގާއިމުވުމުން ބަނދަރުގެ ތަރުތީބު ހިފެހެއްޓުމަށް މަގުފަހިވާނެ ކަމަށް އެމް.ޕީ.އެލް އިން ބުނެއެވެ.
