އަންނަ ޖޫން މަހު ބޭއްވުމަށް ހަމަޖެހިފައިވާ ސިވިލް ސަރވިސް ކޮންފަރެންސްގެ ޕްލެޓިނަމް ސްޕޮންސަރެއްގެ ގޮތުގައި މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އިން މިއަދު ސޮއިކޮށްފިއެވެ. މި އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ ސިވިލް ސަރވިސް ކޮމިޝަނުގައެވެ.
މި އެއްބަސްވުމުގައި އެމް.ޕީ.އެލްގެ ފަރާތުން ސޮއިކުރެއްވީ އެ ކުންފުނީގެ ޗީފް ކޯޕަރޭޓް އޮފިސަރ އަބްދުﷲ ރަޝީދު އެވެ. ސިވިލް ސަރވިސް ކޮމިޝަން (ސީ.އެސް.ސީ) ގެ ފަރާތުން ސޮއިކުރެއްވީ އެ ކޮމިޝަނުގެ ރައީސް މުޙައްމަދު މުޖުތާޒު އެވެ.
ފަސްވަނަ ސިވިލް ސަރވިސް ކޮންފަރެންސް ބޭއްވުމަށް ތާވަލުކޮށްފައިވަނީ 2026 ވަނަ އަހަރުގެ ޖޫން މަހުގެ 7 އިން 9 އަށެވެ. މި ފަހަރުގެ ކޮންފަރެންސްގެ ޝިޢާރަކީ، “ފިއުޗަރ – ރެޑީ ރެސްޕޮންސިވް ގަވަރނަންސް: އެމްޕަވަރ ޕީޕަލް، އެމްބްރޭސް އެޖިލިޓީ، އެންހޭންސް ސަރވިސަސް” އެވެ.
މި ކޮންފަރެންސަކީ ދިވެހި ސިވިލް ސަރވިސްއަށް ދިމާވެފައިވާ ގޮންޖެހުންތައް ދެނެގަނެ، ސިވިލް ސަރވިސްގެ ހިންގުން އިތުރަށް ހަރުދަނާކޮށް ތަރައްޤީކުރާނެ ގޮތްތަކެއް ތަދުބީރުކުރުމުގެ މަޤުޞަދުގައި ބާއްވާ ބައްދަލުވުމެކެވެ. ސިވިލް ސަރވިސްގެ އިސްވެރިންނާއި ސިޔާސީ އިސްފަރާތްތައް ހިމެނޭގޮތަށް ކޮންމެ ދެ އަހަރަކުން އެއް އަހަރު މި ކޮންފަރެންސް ސިލްސިލާކޮށް ބާއްވަމުންގެންދެއެވެ.
2026 ވަނަ އަހަރު ބާއްވާ މި ކޮންފަރެންސްގައި ސިވިލް ސަރވިސްގެ އެކި އިދާރާތަކުން 200 އަށް ވުރެ ގިނަ ބައިވެރިން ބައިވެރިވާނެ ކަމަށް ސިވިލް ސަރވިސް ކޮމިޝަނުން މަޢުލޫމާތުދެއެވެ
