މޯލްޑިވްސް ބްލަޑް ސާވިސަސް (އެމްބީއެސް) އަށް ދިމާވެފައިވާ ލޭ ލިބުމުގެ ދަތިކަމަށް އެހީތެރިވުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިސްނަގައިގެން “ޕޯޓް ކޮމިއުނިޓީ ބްލަޑް ޑޮނޭޝަން ކޭމްޕް” ގެ ނަމުގައި މިއަދު ހާއްސަ ހަރަކާތެއް ފަށައިފި އެވެ.
މި ކޭމްޕް ކުރިއަށްދާނީ އެމްޕީއެލްގެ ހެޑް އޮފީހުގައި މިއަދު ހެނދުނު 11:00 އިން ފެށިގެން އިރުއޮއްސި 18:30 އާ ހަމައަށެވެ. މި ހަރަކާތުގައި އެމްޕީއެލްގެ މުވައްޒަފުންގެ އިތުރުން މާލޭ ވިޔަފާރި ބަނދަރުގައި މަސައްކަތްކުރާ ފަރާތްތަކާއި އާންމުންނަށް ވެސް ލޭ ހަދިޔާކުރުމުގެ ފުރުސަތު ވަނީ ހުޅުވާލާފައެވެ. މި ކޭމްޕަކީ އެމްޕީއެލް އާއި އެމްބީއެސް، މާލެ ސިޓީ ގްރޫޕް އޮފް ހޮސްޕިޓަލްސް އަދި ލޭ އެޕް ގުޅިގެން ކުރިއަށްގެންދާ ހަރަކާތެކެވެ.
ރާއްޖޭގެ ބްލަޑް ބޭންކުން ލޭ ހުސްވަމުންދާތީ އެމްބީއެސް އިން ވަނީ އާންމުންގެ އެހީތެރިކަމަށް އެދިފައެވެ. ޚާއްސަކޮށް އޭ ޕޮޒިޓިވް، އޯ ޕޮޒިޓިވް، ބީ ޕޮޒިޓިވް، އޭބީ ޕޮޒިޓިވް، ބީ ނެގެޓިވް އަދި އޯ ނެގެޓިވް ގްރޫޕްގެ ލޭ ލިބުން ދަތިވެފައިވާކަން އެ އިދާރާއިން ވަނީ ފާހަގަކޮށްފައެވެ.
ލޭ ހަދިޔާކުރަން ބޭނުންވާ ފަރާތްތަކަކީ އުމުރުން 18 އަހަރު ފުރިފައިވާ، އަދި ބަރުދަނުގައި 45 ކިލޯ ހަމަވާ ފަރާތްތަކަށް ވާންޖެހެއެވެ. އަދި ލޭ ހަދިޔާކުރުމުގެ ކުރިން މަދުވެގެން 6 ގަޑިއިރު ނިދި ހަމަކުރުމަށާއި، ލޭ ދިނުމުގެ އެއްގަޑިއިރު ކުރިން ކައިގެން ހުރުމަށް އެމްބީއެސް އިން އިރުޝާދުދެއެވެ.
މި ކޭމްޕްގެ އިތުރުން، ހުޅުމާލެ ފޭސް 1 ގައި ހުންނަ އޮރެންޖު ހިޔާއަށް ގޮސްގެން ވެސް ކޮންމެ ދުވަހަކު (ހުކުރު ދުވަސް ފިޔަވައި) ހެނދުނު 8:00 އިން ރޭގަނޑު 8:00 އަށް ލޭ ހަދިޔާކުރުމުގެ ފުރުސަތު އޮންނާނެއެވެ.
