އެސްޓީއޯ ޕީޕަލްސް ޗޮއިސްގެ އައުޓްލެޓެއް ހުޅުމާލޭގައި ރަސްމީކޮށް ހުޅުވައިފި އެވެ.
ރޭ ބޭއްވި ހާއްސަ ރަސްމިއްޔާތެއްގައި މި އައުޓްލެޓް ހުޅުވައިދެއްވީ އިކޮނޮމިކް މިނިސްޓަރު މުހައްމަދު ސައީދުއެވެ.
މި އައުޓްލެޓް ހުޅުވާފައިވަނީ ހުޅުމާލޭ ރީތިގަސް މަގުގައި ހުންނަ ރެއިން ކޮރަލް ރެޒިޑެންސްގައެވެ. މިއީ ހުޅުމާލެއަށް ބްރިޖުން ފައިބައިގެން އަންނައިރު ހުންނަ އެސްޓާސް ފިހާރައާ ޖެހިގެން ސެންޓްރަލް ޕާކާ ދިމާލަށް ދާން އޮންނަ މަގެވެ. އެސްޓީއޯއިން ބުނީ ހުޅުމާލޭގެ އާބާދީ އިތުރުވަމުންދާއިރު، އެސްޓީއޯގެ ހިދުމަތެއް އެ ސަރަހައްދުގައި ނެތުމުގެ ޝަކުވާ އާންމުންގެ ފަރާތުން ލިބެމުންދާތީ، މި އައުޓްލެޓާއެކު އެކަމަށް ހައްލެއް ލިބޭނެ ކަމަށެވެ.
ކުރިއަށް އޮތް ރަމަޟާން މަހަށް ހާއްސަކޮށް ހުޅުވި މި ފިހާރައިން، ހަނޑޫ، ހަކުރު އަދި ފުށުގެ އިތުރުން އަސާސީ ކާބޯތަކެތީގެ ލިސްޓަށް އަލަށް އިތުރުކުރި 23 ބާވަތެއް ލިބެން ހުންނާނެއެވެ. މީގެ އިތުރުން މާލޭގެ ޕީޕަލްސް ޗޮއިސްއިން ލިބޭ އެސްޓީއޯގެ މަޝްހޫރު ބްރޭންޑްތައް ކަމަށްވާ ހިޓާޗީ، އެލްޖީ އަދި ފިލިޕްސްގެ ހޯމް އިމްޕްރޫވްމެންޓް ސާމާނުތައްވެސް މި އައުޓްލެޓުން ލިބޭނެއެވެ.
އެސްޓީއޯއިން މައުލޫމާތު ދޭ ގޮތުގައި މި އައުޓްލެޓުން މިހާރު އަސާސީ މުދާ ރީޓެއިލްކޮށް ލިބެން ހުރި ނަމަވެސް، ކުރިއަށް އޮތް ތަނުގައި ހުޅުމާލޭގެ ވިޔަފާރިވެރިންނަށް ހޯލްސޭލްކޮށް މުދާ ދޫކުރުމުގެ އިންތިޒާމުވެސް ހަމަޖެހިގެންދާނެއެވެ. އަދި މިއީ ރަމަޟާން މަހާ ދިމާކޮށް ހުޅުވި ތަނެއް ނަމަވެސް، ރަމަޟާން މަހަށް ފަހުވެސް މި އައުޓްލެޓްގެ ހިދުމަތް ދާއިމީކޮށް ކުރިއަށްދާނެއެވެ.
