ރަމަޟާން މަހު ރައްޔިތުންގެ އަތުން ކަރަންޓަށް ކުރާ ހޭދަ ކުޑަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގަންނަވާފައިވާ ވަޢުދުފުޅާ އެއްގޮތަށް، މިއަހަރުގެ ރޯދަ މަހުގެ ކަރަންޓު ބިލު 400 ރުފިޔާއަށްވުރެ ބޮޑު ނުވާނެހެން ޑިސްކައުންޓް ދިނުމަށްޓަކައި އެކަމަށް ބޭނުންވާ ރީޑިންގ ނަގައިފި އެވެ.
ސްޓެލްކޯއިން ހާމަކޮށްފައިވާ ގޮތުގައި، ރަމަޟާން މަހަށް ވަކި ބިލެއް ތައްޔާރުކުރުމަށްޓަކައި ކަރަންޓު މީޓަރުތަކުގެ ރީޑިންގ ނެގުމުގެ މަސައްކަތް މި މަހުގެ 16 އަދި 17 ވަނަ ދުވަހު ވަނީ ކުރިއަށް ގެންގޮސްފައެވެ. މިގޮތަށް ރީޑިންގ ނަގާފައިވަނީ ރޯދަ މަހުގެ ބޭނުންތަކަށް ހިނގާ ކަރަންޓު ވަކިން ހިސާބުކޮށް، ރައްޔިތުންނަށް އެންމެ ފައިދާހުރި ގޮތަކަށް ޑިސްކައުންޓް ފޯރުކޮށްދިނުމަށެވެ.
މިއީ ރަމަޟާން މަހެއްގައި ރާއްޖޭގެ ހުރިހާ ރައްޔިތުންނަށް އަމާޒުކޮށް މިފަދަ ލުޔެއް ދޭ ތިންވަނަ ފަހަރެވެ. މިދިޔަ އަހަރުވެސް ސަރުކާރުން ވަނީ ކަރަންޓު ބިލާއި ފެން ބިލުން ޑިސްކައުންޓް ދެއްވުމަށްޓަކައި 130 މިލިޔަން ރުފިޔާ ހޭދަކޮށްފަ އެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން ރައްޔިތުންގެ ދިރިއުޅުމުގެ ހަރަދުތައް ކުޑަކުރުމަށް ދެއްވާ އަހަންމިއްޔަތުގެ ދަށުން، ކަރަންޓު ބިލުގެ އިތުރުން އިތުރު ލުއިތަކެއްވެސް ވަނީ ފޯރުކޮށްދީފައެވެ. އެގޮތުން، ރޯދަ މަހުގެ ހަދިޔާއެއްގެ ގޮތުގައި ކޮންމެ ގޭބީސީއަކަށް މަސްދަޅު ކޭހެއް ބެހުމުގެ މަސައްކަތްވެސް ސަރުކާރުން ވަނީ ކުރިއަށް ގެންގޮސްފައެވެ.
