މަތީ ތަޢުލީމާއި ވައިގެ ދަތުރުފަތުރުގެ ދާއިރާއިން ދިވެހިރާއްޖެއާއި ބަންގްލަދޭޝްއާ ދެމެދު އޮތް ގުޅުން އިތުރަށް ބަދަހިކުރުމަށް މަޝްވަރާ ކުރައްވައިފި އެވެ.
މި މަޝްވަރާތައް ކުރިއަށްދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބަންގްލަދޭޝްގެ ބޮޑުވަޒީރުކަމަށް އަލަށް އިންތިހާބުވެވަޑައިގެންނެވި ތާރިޤް ރަޙްމާނާއެކު އިއްޔެ ބޭއްވި ރަސްމީ ބައްދަލުވުމުގައެވެ. މި ބައްދަލުވުން ބާއްވާފައިވަނީ ބަންގްލަދޭޝްގެ އައު ސަރުކާރު ހުވާކުރުމަށް ބޭއްވި ރަސްމިއްޔާތުގެ ހަވާސާގައެވެ.
ބައްދަލުވުމުގައި ރައީސުލްޖުމްހޫރިއްޔާ ވަނީ މި މަހުގެ 12 އިން 13 އަށް ބަންގްލަދޭޝްގައި ބޭއްވި ރައްޔިތުންގެ މަޖިލީހުގެ އިންތިހާބުގައި ތާރިޤް ރަޙްމާނާއި ބަންގްލަދޭޝް ނޭޝަނަލިސްޓް ޕާޓީ (ބީ.އެން.ޕީ) އިން ހޯދި ކާމިޔާބީއަށް މަރުޙަބާ ދަންނަވާފައެވެ. އަދި ދެ ޤައުމުގެ ދެމެދުގައި އޮތް ބަދަހި ގުޅުމާއި ދޭދޭ ގުޅުންތައް އިތުރަށް ހަރުދަނާކުރެއްވުމަށް ދިވެހި ސަރުކާރުން މަސައްކަތްކުރައްވާނެކަމުގެ ޔަޤީންކަން އެމަނިކުފާނު ދެއްވިއެވެ.
ބަންގްލަދޭޝްގެ ބޮޑުވަޒީރުގެ ވާހަކަފުޅުގައި، އެމަނިކުފާނު މަޤާމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ބަންގްލަދޭޝްއަށް ކުރެއްވި ދަތުރުފުޅަށްޓަކައި ޚާއްޞަ ޝުކުރެއް އަދާކުރެއްވިއެވެ.
ދެ ޤައުމުގެ ވެރިންގެ މި ބައްދަލުވުމުގައި، ވިޔަފާރިއާއި އިންވެސްޓްމަންޓްގެ ދާއިރާ އިތުރަށް ފުޅާކުރުމާ ގުޅޭގޮތުން މަޝްވަރާކުރެއްވިއެވެ. މީގެ އިތުރުން މަތީ ތަޢުލީމާއި، ވައިގެ ދަތުރުފަތުރާއި، ސިއްޙީ ދާއިރާ އަދި ތިމާވެށީގެ ދާއިރާއިން ގުޅުން ބަދަހިކޮށް، އެކި ދާއިރާތަކުން އެހީތެރިކަން ފޯރުކޮށްދިނުމާ ގުޅޭގޮތުން ދެ ބޭފުޅުން ފުޅާ ދާއިރާއެއްގައި ޚިޔާލު ބަދަލުކުރެއްވިއެވެ.
މި މަޝްވަރާތަކުގެ ސަބަބުން ރާއްޖެއާއި ބަންގްލަދޭޝްއާ ދެމެދު އޮތް އެކުވެރިކަމުގެ ގުޅުން އިތުރު ހަރުފަތަކަށް ކުރިއަށްދާނެ ކަމަށް ބެލެވެއެވެ.
