އަލަށް ޗާޕްކޮށްގެން ރާއްޖެއަށް ގެނައި 100 ރުފިޔާގެ ނޫޓުތައް ނެރެފިއެވެ.
މަރުކަޒީ ބޭންކް (އެމްއެމްއޭ) އިން ބުނިިގޮތުގައި އިގްތިސާދުގައި ނަގުދު ފައިސާ އަށް އަލަށް އުފެދޭ ޑިމާންޑަށާއި އެ އޮތޯރިޓީއަށް ލިބޭ ނޫޓުގެ ތެރެއިން ބައުވެ ހަލާކުވެގެން ނަގާ ނޫޓުތަކުގެ ބަދަލުގައި ބޭނުންކުރުމަށް، މިމަހުގެ 2 ވަނަ ދުވަހުގައި ވަނީ 100 ރުފިޔާގެ އައު ނޫޓް ސްޓޮކެއް ރާއްޖެއަށް ގެނެސްފައެވެ. އަދި މިމަހުގެ 15 ވަނަ ދުވަހުގަ ވެސް 20 ރުފިޔާގެ އައު ނޫޓް ސްޓޮކެއް ރާއްޖެއަށް ވަނީ ގެނެސްފަ އެވެ.
އެގޮތުން، އެމްއެމްއޭއިން ބުނިގޮތުގައި މިހާރު އަލަށް ގެނައި މި ނޫޓްތައް މިއަދުން ފެށިގެން ދައުރުވާ ފައިސާ ތެރެއަށް ދޫކުރުމަށް ހަމަޖެހިފައެވެ. އަދި ނަގުދު ފައިސާގެ ގޮތުގައި އަލަށް ޗާޕުކޮށްގެން މިނެރޭ 20 ރުފިޔާ އަދި 100 ރުފިޔާގެ ނޫޓުގައި ސޮއިކުރައްވާފައިވަނީ މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހްމަދު މުނައްވަރު ކަމަށް ވެސް އެމްއެމްއޭއިން ބުނެފައިވެއެވެ.
މި ދެ ނޫޓުގެ ތާރީހަކީ 31 ޖުލައި 2025، 6 ޞަފަރު 1447 ކަމަށާއި، އަލަށްނެރޭ މި ނޫޓުތަކުގެ ތެރެއިން 20 ރުފިޔާގެ ނޫޓްގެ ފުށުގައި ދިވެހި ރުފިޔާގެ ނިޝާން އަލަށް ހިމަނާފައިވާނެ ކަމަށް އެމްއެމްއޭއިން ބުނެފައިވެއެވެ. މިގޮތުން ދިވެހި ރުފިޔާގެ ނިޝާން ހިމަނާފައިވާނީ ނޫޓުގެ މޫނުމަތީގެ ވައަތްފަރާތުން މަތީގައިވ،ާ މޫނުމަތީ އަގާއެކު އަދި ނޫޓުގެ ފަހަތުގެ ކަނާތް ފަރާތުން މަތީގައިވ،ާ މޫނުމަތީ އަގާއެކުކަމަށް އެމްއެމްއެއިން ބުނެފައިވެއެވެ. މިގޮތައް، 2024 ވަނަ އަހަރުގެ ޖުލައި7 ވަނަ ތާރީހުގައި އެންމެފަހުން ނެރުނު 100 ރުފިޔާގެ ނޫޓާއި އެއްގޮތަށް 100 ރުފިޔާގެ މި އައު ޗާޕުގައިވެސް ދިވެހި ރުފިޔާގެ ނިޝާން ހިމަނާފައިވެއެވެ.
