36 ކިލޯއަށްވުރެ ގިނަ މަސްތުވާތަކެތި އެތެރެކުރިި ކަމަށް ތުހުމަތުކުރެވޭ މައްސަލައިގަ ދެ މީހަކު ހައްޔަރުކޮށްފި އެވެ.
މުދާތަކެއްގެ ތެރޭގައި ފޮރުވައިގެން ރާއްޖެއަށް މަސްތުވާތަކެތި އެތެރެކޮށް އެ ތަކެތި ޓްރެފިކް ކުރާކަމަށް ތުހުމަތުކުރެވޭ މައްސަލައާ ގުޅިގެން ދެ މީހަކު ހައްޔަރުކުރީ މި މަހުގެ12 ވަނަ ދުވަހު ހިންގި އޮޕަރޭޝަނެއްގަ އެވެ.
މި މައްސަލާގައި ހައްޔަރުކޮށްފައި ވަނީ މ. މުލައް / މަދާރުގެ، ޙަސަން މަފާޒު (26އ) އާއި ހ. ފިލްމީސައިޓް / މާލެ، ވިޝާމް މުޙައްމަދު (35އ) އެވެ.
މި މީހުން އެތެރެކޮށްފައިވާ މަސްތުވާ ތަކެތީގެ މަގުމަތީ އަގަކީ 29 މިލިއަން ރުފިޔާ ކަމަށް ކަސްޓަމްސްއިން ވަނީ ހާމަކޮށްފައެވެ. މި މަސްތުވާތަކެތި ތަހުގީގު ކުރުމަށްޓަކައި ފުރަތަމަ ކުރި ޓެސްޓުތަކުން މިތަކެއްޗަކީ ހަޝިޝް އޮއިލްއަށް ޕޮސިޓިވްވެފައިވާ ކަމަށް ވެސް ކަސްޓަމްސްއިން ވަނީ ބުނެފައެވެ.
މި މައްސަލައާ ގުޅިގެން އެ ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.
