ގައުމުގެ މަސްލަހަތާއި އަމާންކަން ދެމެހެއްޓުމަށް ސަރުކާރު ހިންގާ ޕީއެންސީގެ ކެޑިޑޭޓުންނަށް ވޯޓުލުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ގޮވާލައްވައިފި އެވެ.
މާމިގިލީ ދާއިރާގެ މެމްބަރު ގާސިމް މިފަދައިން ވިދާޅުވެފައި ވަނީ އދ. މާމިގިލި އަދި ފެންފުށި ކައުންސިލަށް ޖުމްހޫރީ ޕާޓީން ވާދަކުރާ ކެންޑިޑޭޓުންގެ ކެމްޕެއިން އިފުތިތާހު ކުރަން ބޭއްވި ޖަލްސާގަ ވާހަކަ ދައްކަވަމުންނެވެ. ގާސިމް އިބްރާހިމް ވިދާޅުވިގޮތުގައި ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓު ދިނުން އެންމެ ރަނގަޅުވާނީ މި ސަރުކާރު ހިންގާ ޕާޓީ ކަމަށްވާ ޕީއެންސީގެ ޓިކެޓްގައި ނިކުންނަ މެންބަރުންނަށެވެ.މއޭނާ ވަނީ ޖުމްހޫރީ ޕާޓީގެ ހުރިހާ މެންބަރުން ޕީއެންސީގެ ކެޑިޑޭޓުންނަށް ތާއިދު ކުރުމަށް ވިދާޅުވެފައެވެ.
“ހުރިހާ ބޭފުޅުން ވެސް ވޯޓު ދެއްވާށޭ ޕީއެންސީގެ މެންބަރުންނަށް، ގައުމުގެ މަސްލަހަތާއި އަމާންކަން ކުރިއަށް ގެންދިޔުމަށްޓަކައި، ތިޔަ ބޭފުޅުން އެންމެ ރަނގަޅު ވޯޓު ނުދެއްވީ ޕީއެންސީ އަށް. އިދިކޮޅު ކެންޑިޑޭޓުންނަށް ވޯޓު ދެއްވީ. އެއްވެސް ކަމެއް ކުރެވޭނެތަ؟ ރަށުން ބޭލޭނެތަ އެ މަނިކުފާނު؟ ވެރިކަމުން ބޭލޭނެތަ އެމަނިކުފާނު؟. ނޯ. ކީއްކުރަންތޯ ބޭނުން ނެތް ކަމެއް ކުރަނީ.” އޭނާ ވިދާޅުވެފައިވެއެވެ.
މިއާއެކު، ގާސިމް އިބްރާހީމް ވަނީ ޕީއެންސީއަށް ވޯޓު ނުލާނަމަ، އެޕާޓީއާ އިދިކޮޅު ޕާޓީގެ މެންބަރުންނަށް ތާއިދުކޮށް ވޯޓު ނުދިނުމަށް ވެސް ގޮވާލާފައެވެ. އެއީ އިދިކޮޅު ޕާޓީއަށް ވޯޓުލުމަކީ ބޭނުންނެތް ކަމަކަށް ވާތީ ކަމަށް އޭނާ ވިދާޅުވެފައިވެއެވެ.
ގާސިމް އިބްރާހިމް އިތުރަށް ވިދާޅުވިގޮތުގައި މިހާރު އެންމެ އިސްކަމެއް ދީގެން ކުރަންޖެހޭކަމަކީ ގައުމުގެ ދަރަނި ފިލުވުމެވެ. އެކަން ކުރެވޭނީ ރައީސް ޑރ މުހައްމަދު މުއިއްޒަށް އެއްބާރުލުން ދީގެންކަމަށް ވެސް އޭނާ ވިދާޅުވެފައިވެއެވެ. އެހެންވެ، ކުރިއަށް އޮތް މި އިންތިހާބުގައި ޕީއެންސީގެ ކެޑިޑޭޓުން ހޮވުމަށް އިސްކަން ދިނުމަށް ތަކުރާރުކޮށް ވިދާޅުވެފައެވެ.
