ކޯޓުތަކުގެ ބެކްލޮގުގެ މަސައްކަތް ނިންމުމުގެ ހާއްސަ މަސައްކަތަށް ޓާސްކް ފޯސްއެއް އެކުލަވާލާފައިވާ ކަމަށް ސްޕްރީމް ކޯޓުން ބުނެފި އެވެ.
މިދިޔަ އަހަރު ނިމުނު އިރު، އެއްއަހަރަށް ވުރެ ގިނަ ދުވަސްވެފައިވާ13032 މައްސަލަ، ރާއްޖޭގެ ކޯޓުތަކުގައި ބެކްލޮގުގެ ގޮތުގައި ރިކޯޑްކޮށްފައި އޮތްކަމަށް ސްޕްރީމް ކޯޓުން ވަނީ ބުނެފަ އެވެ. އެހެންވެ، މި މައްސަލަތަކުގެ އިންސާފު އަވަހަސްކަމާއެކު ފޯރުކޮށްދިނުމުގެ މަސައްކަތް އިންތިޒާމު ކުރުމަށްޓަކައި، އަދި މި މައްސައްކަތް ނިންމުމަށް ވަރަށް ހާއްސަ އިސްކަމެއް ދީގެން ކުރިއަށް ގެންދިއުމަށް ޓާސްކްފޯސްއެއް ދިވެހިރާއްޖޭގެ އުއްތަމަ ފަނޑިޔާރު މިއަދު އެކުލަވާލައި އެ ޓާސްކުފޯހުގެ މަސައްކަތް މިއަދު ފަށާފައިވާ ކަމަށް ވެސް ސްޕްރިމް ކޯޓުން ވަނީ ބުނެފައެވެ.
މި ޓާސްކު ފޯހަކީ އެކި މަރުހަލާތަކުގައި ކޯޓުތައް ތަމްސީލުކޮށްފައިވާ 9 މެންބަރުންގެ ޓާސްކު ފޯހެކެވެ. މި ޓާސްކުފޯހުން ކުރާނެ މަސައްކަތްތަކަކީ މިހާރު ނުނިމި ހުރި މައްސަލަ ކުރިއަށް ގެންދިއުމަށް ދިމާވެފައިވާ ގޮންޖެހުންތަކަށް އިދާރީ ގޮތުން ހައްލު ހޯދައިދީ މައްސަލަ އަވަހަށް ނިންމުމަށް މަގު ފަހިކޮށްދިނުމެވެ.
