ޑިމޮކްރެޓިކް ނިޒާމުގެ ތެރެއިން ރައްޔިތުންގެ ބައިވެރިވުން ހަރުދަނާކުރުމަށް ދިވެހިރާއްޖޭގައި ފުރަތަމަ ފަހަރަށް އިލެކްޓްރޯނިކް ޕެޓިޝަން ސިސްޓަމް (އީ-ޕެޓިޝަން ޕޯޓަލް) އިފްތިތާހް ކޮށްފިއެވެ.
މި ޕޯޓަލްއަކީ ރައްޔިތުންގެ މަޖިލީހުގެ މަސައްކަތްތައް ޑިޖިޓަލައިޒްކުރުމަށާއި، ޑިމޮކްރެޓިކް ނިޒާމުގެ ތެރެއިން ރައްޔިތުންގެ ބައިވެރިވުން ހަރުދަނާކުރުމަށް އެޅުނު ތާރީހީ ފިޔަވަޅެއްކަމަށް ރައްޔިތުން މަޖިލީހުން ވަނީ ބުނެފައެވެ.
މި ޕޯޓަލް މެދުވެރިކޮށް ރައްޔިތުންނަށް އޮންލައިންކޮށް ޕެޓިޝަން ހުށަހެޅުމާއި، ހުށަހަޅާފައިވާ ޕެޓިޝަންތަކުގެ މަސައްކަތް މަޖިލީހުގައި ކުރިއަށްދާ ގޮތުގެ އަދާހަމަ މަޢުލޫމާތު ލިބުމުގެ ފުރުސަތު ލިބިގެންދާނެކަމަށް މަޖިލީހުން ވަނީ މައުލޫމާތު ދީފައެވެ. އަދި މި ޕޯޓަލްގައި ސޮއިކުރުމާއި، ސޮއިކުރާ ފަރާތްތަކުގެ ސައްހަކަން ކަށަވަރުކުރާނީ ‘އީ-ފާސް’ މެދުވެރިކޮށް ކަމަށް ވެސް ބުނެފައިވެއެވެ.
މި ޕޯޓަލްގެ ސަބަބުން، ޕެޓިޝަނެއް ހުށަހެޅުމުގައި ރައްޔިތުންގެ މަޖިލީހުގެ މެންބަރުންނަށް ބަރޯސާވުން ކުޑަވެ، ދިވެހިރާއްޖޭ ކޮންމެ ހިސާބެއްގައި ހުންނަ ރައްޔިތަކަށްވެސް ފަސޭހަކަމާއެކު ޕެޓިޝަން ހުށައެޅޭނެއެވެ. އަދި ޕެޓިޝަނަކަށް ސޮއި ލިބޭ މިންވަރަށް ބަލައި، ރައްޔިތުންގެ މަޖިލީހުގެ މަސައްކަތުގެ ދާއިރާގެ ތެރެއިން އެޅުމަށް ލާޒިމުވާ ފިޔަވަޅުތައް މި ނިޒާމުގެ ތެރެއިން ވަނީ ތައާރަފްކޮށްފައެވެ.
މި ޕޯޓަލާއެކު، ދެކުނު އޭޝިއާ އަދި ދެކުނު އިރުމަތީ އޭޝިއާގެ ގައުމުތަކުގެ ތެރެއިން ގާނޫނު ހަދާ މަޖިލީހަކުން އިލެކްޓްރޯނިކް ޕެޓިޝަން ނިޒާމެއް ގާއިމުކޮށްފައިވާ މަދު ގައުމުތަކުގެ ތެރޭގައި ދިވެހިރާއްޖެ ހިމެނޭނެކަމަށް މަޖިލީހުން ބުނެފައިވެއެވެ، އަދި މި ސަރަހައްދުން މިފަދަ ނިޒާމެއް މިހާތަނަށް ގާއިމުކޮށްފައިވަނީ ހަމައެކަނި ޕާކިސްތާނާއި ތައިލެންޑުން ކަމަސް ވެސް ފާހަކޮށްފައިވެއެވެ.
މި ޕޯޓަލްގެ ޒަރިއްޔާއިން:
- ބައިވެރިވުމަށް ހުރި ހުރަސްތައް ނައްތާލެވުން
- ޑިމޮކްރެސީ ހަރުދަނާކުރުމަށްޓަކައި ޑިޖިޓައިޒްކުރުން
- ކުރިމަގުގެ ޑިޖިޓަލް އީޖާދުތަކަށް އެޅުނު ބިންގަލަކަށްވުން
- ބައިނަލްއަގްވާމީ ބައިވެރިންގެ އެހީތެރިކަން ލިބުން
މިފަދަ ފައިދާތައް ލިބިގެން ދާނެ ކަމަށް މަޖިލީހުން ބުނެފައިވެއެވެ.
